Փաստ ինֆո

Դատավորներին զրպարտած փաստաբան Ալեքսանդր Սիրունյանին ցանկանում են տեղափոխել ԲԴԽ՝ թերևս «բարձրացնելու» դատական համակարգի հեղինակությունը։ Թե ինչպես է դատավորներին թիրախավորող անձը ապահովելու դատական համակարգի անկախությունը՝ պարզ չէ, թեև՝ գուցե հասկանալի է՝ դատավորների նկատմամբ հետապնդումների տրամաբանության ներքո։

Ինչպես արդեն տեղեկացրել ենք՝ ՔՊ վարչության նիստում որոշում է կայացվել ՔՊ խմբակցությանն առաջարկել Ալեքսանդր Սիրունյանի թեկնածությունը՝ ԲԴԽ անդամի թափուր տեղի պաշտոնում ներկայացնելու համար։ Ընդ որում, այս որոշումը կայացվել է այն բանից հետո, երբ նույն ՔՊ վարչությունը մերժել էր նրա թեկնածությունը՝ ՀՀ արդարադատության նախարարի պաշտոնում։ Ինչևէ, Սիրունյանն, ամենայն հավանականությամբ, մատուցած ծառայությունների համար առանց պարգևատրման չի մնա։ Եթե ՔՊ-ն նրան կրկին «չգցի», ապա վերջինս կտեղափոխվի ԲԴԽ՝ որպես իրավաբան -գիտնական։

Հատկանշական է, սակայն, այն հանգամանքը, որ բացի այն, որ Սիրունյանն առավոտից երեկո քաղաքական բնույթի ուղղորդված հայտարարություններ է անում սոցիալական ցանցերում՝ առերևույթ աջակցություն հայտնելով այս իշխանություններին, մասնակցում Փաշինյանի տիկնոջ հետ հանդիպմանը՝ որպես «հանրային կարծիք» ձևավորող, ինչը փաստացի հակասելու է դատավորի կարգավիճակից բխող օրենսդրական պահանջներին, այն է՝ քաղաքականապես զուսպ լինելը, այլև՝ այն, որ Սիրունյանն աչքի է ընկել հատկապես դատավորների վերաբերյալ գնահատականներ հնչեցնելով, հատկապես՝ զրպարտիչ բնույթի հայտարարություններով, ինչի վերաբերյալ անգամ քրեական վարույթ կա։

Մասնավորապես, ԱԱԾ-ում ավելի քան չորս տարի քննվել, ապա՝ ՔԿ է տեղափոխվել դատավոր Դավիթ Գրիգորյանի, փաստաբան Ալեքսանդր Սիրունյանի հաղորդումների հիման վրա հարուցված, ապա՝ մեկ վարույթում միացված քրեական գործը։

Նշված քրեական գործը, հիշեցնենք, հարուցվել է ՀՀ երկրորդ նախագահ Ռոբերտ Քոչարյանի նկատմամբ ընտրված խափանման միջոց կալանավորումը փոխելու եւ անձնական երաշխավորություն կիրառելու մասին դատավոր Դավիթ Գրիգորյանի 2019թ մայիսի 18-ի որոշումից հետո: Փաստաբան Ալեքսանդր Սիրունյանը դատավոր Դավիթ Գրիգորյանին սոցիալական ցանցում մեղադրեց կոռուպցիայի մեջ, ինչին անմիջապես արձագանքեց դատավորն ու հաղորդում ներկայացրեց, որ ստուգեն փաստաբանի հայտնած տվյալները ու կամ իրեն մեղադրանք առաջադրեն` կաշառակերության համար, կամ փաստաբանին` սուտ մատնության: Ինչպես գիտենք` դատավորին նման մեղադրանք չի առաջադրվել, այս 4 տարիների ընթացքում ԱԱԾ-ն օգտագործելով իր օպերատիվ ռեսուրսները չի գտել նման որեւէ ապացույց՝ այդպիսով փաստված համարելով, որ փաստաբանն անվանարկել է դատավորին, խաղացել դատական ատյանի հեղինակության հետ, զրպարտել:

«Փաստինֆո»-ն գրավոր հարցմամբ դիմել է թե՛ ՀՀ գլխավոր դատախազությանը, թե՛ ՔԿ-ին՝ պարզելու, թե ինչ փուլում է քրեական վարույթը, արդյո՞ք մեղադրյալներ կան գործով։

Երկու կառույցից ստացված պատասխանների համաձայն՝ քրեական վարույթը գտնվում է նախաքննության փուլում։ Այսինքն՝ քրեական գործով շուրջ 5 տարի քննություն իրականացնելու հետ դատախազությունում բոլորովին համերաշխ են։ Սակայն այստեղ կա նաեւ այլ խնդիր՝ վարույթն իրականացնող մարմինը չի կարճել վարույթը, այսինքն, թեեւ Ալեքսանդր Սիրունյանն այսօր, թեեւ, չունի մեղադրյալի կարգավիճակ՝ դատավորի նկատմամբ սուտ մատնություն, զրպարտություն կատարելու համար, այդուհանդերձ, այդ հեռանկարը «Դամոկյլան սրի» պես կախված է նրա գլխին, չի բացառվում, որ ցանկացած պահի իշխանությունները որոշեն քրեական հետապնդում իրականացնել նրա նկատմամբ ու այդպես ավելի վերահսկելի դարձնեն նրան ԲԴԽ անդամի կարգավիճակում, թեեւ, ինչպես կասեր Փաշինյանի աշխատակազմի ղեկավար Արայիկ Հարությունյանը, նա առանց այն էլ ՔՊ քաղաքական թիմի մաս է ու պատրաստ է եղել կիսել քաղաքական պատասխանատվությունն ու դառնալ գործադիրի անդամ։

Ի դեպ, Սիրունյանի անունը շոշափող սա առաջին գործը չէ։ ՔԿ-ում քաղաքացու հաղորդման հիման վրա արդեն եղել է հարուցված քրեական գործ՝ փաստաբաններ Ալեքսանդր Սիրունյանի և Կարեն Կիրակոսյանի կողմից ենթադրյալ խարդախություն կատարելու փաստի առթիվ, որը հանցակազմի բացակայության հիմքով կարճվել է։

Հ.Գ. Հայաստանում կարծես ստեղծվել էր հակակոռուպցիոն կոմիտե, որը կոչված է ստուգելու նաեւ նման թեկնածուների բարեվարքությունը։Հետաքրքիր է, թե այս դեպքում ինչ եզրահանգման կգան, թեեւ նախկինում եղել են դեպքեր,երբ ՔՊ-ի անտեսել է բացասական եզրակացությունն ու իրենց սրտի ուզած թեկնածուին նշանակել անհամատեղելի պաշտոնում։
Հեղինակ՝ Իզաբել Սահակյան

Աղբյուր` Փաստինֆո