Փաստ ինֆո

Պաշտպանության նախարար Սուրեն Պապիկյանն օրերս Ազգային ժողովում հայտարարեց, որ Անվտանգության խորհուրդը հաստատել է բանակի զարգացման ռազմավարությունը։ Թեև Պապիկյանը խոստացավ, որ օրերս ռազմավարության հրապարակելի հատվածը կհրապարակվի, բայց մեկ շաբաթ անց էլ ռազմավարությունը հրապարակված չէ։ Ու անգամ ոչ իշխանամետ պատգամավորներին այդ փաստաթղթին ծանոթանալու հնարավորություն չի տրվել։

Ռազմական փորձագետ Կարեն Հովհաննիսյանից «Փաստինֆոն» հետաքրքրվեց, թե արդյոք ծանոթ է ռազմավարությանը և պատկերացում ունի, թե ինչ բանակ ենք ունենալու տարիներ անց։

Հովհաննիսյանը նշեց, որ ռազմավարությանը ծանոթ չէ, այս թեմայով որևէ քննարկման էլ չի մասնակցել։ «Եթե նման քննարկում լիներ՝ ես կիմանայի, բայց ռազմավարությունը գերատեսչության ռազմավարությունն է, շատ դեպքերում, քանի որ տվյալ գորատեսչությունը ազգային անվտանգության հարց է լուծում՝ այն հանրային քննարկման չի դրվում։ Օրենքը կարող է դրվել քննարկման, բայց ոչ ռազմավարությունը, որքան հասկանում եմ՝ այն մի քանի գերատեսչություններով է անցել»։

Խորհրդարանական կառավարման մոդել ընտրած երկրում ռազմավարությունը որևէ կերպ չի քննարկվել նաև խորհրդարանական խմբակցությունների հետ։

«Պատիվ ունեմ» խմբակցության քարտուղար Տիգրան Աբրահամյանը նշեց, որ տեղյակ չէ, որ ռազմավարությունը քննարկվել է։ «Միգուցե պաշտպանության և անվտանգության հանձնաժողովում քննարկվել է, բայց քանի որ ես հանձնաժողովի աշխատանքներին չեմ մասնակցում, տեղյակ չեմ այդ ռազմավարությունից»։

«Հայաստան» խմբակցության պատգամավոր Գեղամ Մանուկյանը, որը մասնակցում է հանձնաժողովի աշխատանքներին, եւս տեղյակ չէր ռազմավարության մշակման ընթացքում որևէ քննարկման մասին։
«Ամեն դեպքում՝ ռազմավարությունը ահավոր ուշացել է, 2022 թ-ին ռազմավարությունն այդեն պատրաստ էր, բայց դեռ փետրվարին Սուրեն Պապիկյանը հայտարարեց, որ կա նախագիծ, բայց այն չի բավարարում իրեն և պետք է լրամշակվի։ Արդյունքում, միայն հիմա՝ միայն 2 տարի անց հայտնում են, որ Անվտանգության խորհուրդն այն ընդունել է։

Այսինքն, 2020 թ-ի պատերազմից անցել է 4 տարի և զինված ուժերի բարեփոխման հայեցակարգը նոր միայն հաստատվել է։ Մանուկյանը նշեց, որ 2022թ-ին էլ որևէ քննարկում չի եղել։ «Որքան հասկանում եմ՝ Պաշտպանության նախարարության շրջանակներում է մշակվել»։

Նա ընդգծեց, որ ծանոթացել է 2026-27 թթ-ին զինված ուժերի զարգացման պլանին և սպառազինության ձեռք բերման պլանին, սակայն խնդրահարույցն այն է, այդ պլանները միջնաժամկետ, կարճաժամկետ և երկարաժամկետ կտրվածքով ներկայացված չեն, որպեսզի կարողանանք հաշվետվողականություն ունենալ։ «Այն ամենը ինչ գրված է՝ բարի ցանկությունների շարք է, թե ինչ են ուզում անել մինչև 2027 թ-ը»։

Մանուկյանի խոսքերով՝ քանի որ ծանոթ չէ ռազմավարությանը, ուստի բովանդակային քննարկման, թե ինչի մասին է հայեցակարգը և ինչ բանակ ենք ուզում ունենալ, պատրաստ չէ։ «Չնայած նախարարը հայտնել էր, որ հրապարակման ենթակա հատվածը շուտով կհրապարակվի, սակայն այն դեռ հրապարակված չէ։ Ամեն դեպքում՝ ես դիմելու եմ նախարարությյանը, որպեսզի հնարավորության ունենամ ծանոթանալ ամբողջական փաստաթղթին, բայց դե քանի որ հիմա օրենքով չէ, այլ Նիկոլ Փաշինյանի քիմքին համապատասխան է՝ դեռ պետք է հասկանալ, թե ինչ կպատասխանի Նիկոլ Փաշինյանը»,-ասաց Մանուկյանը։

Աղբյուր` Փաստինֆո