Փաստ ինֆո

Այս պահին նախարարական մակարդակով կամ երկրների ղեկավարների մակարդակով որևէ հանդիպման պայմանավորվածություն չկա: Այս մասին լրագրողների հետ զրույցում ասաց ԱԳ նախարարի տեղակալ Վահան Կոստանյանը ՝ պատասխանելով հարցին, թե առաջիկայում արդյոք հնարավոր է Հայաստանի և Ադրբեջանի արտգործնախարարների հանդիպում:

«Հայկական կողմը շահագրգռված է հանդիպումներն ինտենսիվացնելու, որպեսզի հնարավոր լինի հնարավորինս կարճ ժամկետում ավարտել համաձայնագրի տեքստի համաձայնեցումը»,- ասաց նա:

Անդրադառնալով Բելգիայում ՀՀ դեսպան Տիգրան Բալայանի հասցեին ադրեջանցի դեսպանի հնչեցրած սպառնալիքներին՝ Կոստանյանը նշեց․ «Մենք մեր գնահատականը տվել ենք և դրա մասին մեր նկատառումները հայտնել ենք թե՛ դեսպանընկալ պետությանը, թե՛ այլ գործընկերներին»։

Հարցին՝ ինչպես ստացվեց, որ Տիգրան Բալայանը մասնակցել է Թուրքիայի ազգային տոնին նվիրված միջոցառումներին, արդյոք դա համաձայնեցված էր ԱԳՆ-ի հետ՝ Կոստանյանը պատասխանեց՝ համաձայնեցված է, կարծում են՝ դիվանագիտական շփումները տարբեր մակարդակներում, այդ թվում՝ դեսպանների մակարդակով նորմալ պրակտիկա է։

«Եղել է հրավեր՝ մասնակցելու ընդունելությանը, հրավերն ընդունվել է»,- ասաց նա։
Իսկ թե արդյո՞ք Թուրքիայից կամ Ադրբեջանից մասնակցել են՝ Հայաստանի կազմակերպած միջոցառումներին՝ Կոստանյանը նշեց, որ Թուրքիայի ներկայացուցիչները մասնակցում են ՀՀ կազմակերպած տարբեր ընդունելությունների, ինչը նորմալ է։

Աղբյուր` Փաստինֆո