Փաստ ինֆո

Ծիծեռնակաբերդի համար պայքարը մեկ անձի առաքելությունը չի կարող լինել, գրում է պատմական գիտությունների դոկտոր, Հայոց ցեղասպանության թանգարան-ինստիտուտի նախկին տնօրեն Հայկ Դեմոյանը:

«ՔՊ-ի հաջորդ թիրախը լինելու է Հայոց ցեղասպանության թանգարանը: Ո՞րն է քո անելիքը ՀՀ քաղաքացի

Արարատը Արագածով փոխարինող, պատմության դասագրքերը կեղծող ու այլանդակող, ցեղասպանության զոհերի քանակը ճշտող ու Հայոց ցեղասպանության միջազգային ճանաչումը օրակարգից հանող կառավարության հաջորդ թիրախը տրամաբանորեն հանդիսանալու է Հայոց ցեղասպանության թանգարան-ինստիտուտի գործունեության ժամանակավոր կամ մշտական դադարեցումը: Սա կարմիր գիծ չէ ամենևին, սա վերջնականապես ամեն ինչ թաղելու ու ոչնչացնելու ազդարարումն է: Դրա հավելյալ վկայություններից է նաև վերջին վեց տարիների ընթացքում Ծիծեռնակաբերդում թույլ տված տարատեսակ այլանդակություններն ու հանցավոր գործելաոճը:

Առաջարկում եմ ստեղծել հանրային վերահսկողության մարմին, որն ուշի ուշով կհետևի Ծիծեռնակաբերդի հուշահամալիրի շուրջ տեղի ունեցող զարգացումներին:

 
Յուրաքանչյուր ամիս հանդիպում տեղի կունենա ՀՑԹԻ տնօրինության ու Հոգաբարձուների խորհրդի անդամների հետ` թանգարանի շուրջ տեղի ունեցող զարգացումների մասին տեղեկանալու համար: Այս մարմինը որևէ կերպ չի խոչընդոտելու թանգարանի բնականոն աշխատանքը և որևէ անօրինական գործելաոճ չի որդեգրի:

Այս առաքելության հիմնական նպատակը հանրային իրազեկման ապահովումն է` հաշվի առնելով այն հնարավոր վտանգները, որոնք կարող են հանգեցնել Հայոց ցեղասպանության թանգարան-ինստիտուտի գործունեության դադարեցմանը:

Ովքե՞ր են պատրաստ միանալ այդ մարմնին, ս. թ. նոյեմբերի 30-ին թանգարանի տնօրինության և Հոգաբարձուների խորհրդի անդամների հետ հանդիպելու համար:

Հանդիպման մասին թանգարանի տնօրինությունը պաշտոնական նամակով գրավոր կծանուցվի:

Ծիծեռնակաբերդի համար պայքարը մեկ անձի առաքելությունը չի կարող լինել:

Տե´ր կանգնիր քո հիշողությանն ու արժանապատվությանը»:

Աղբյուր` Փաստինֆո