Փաստ ինֆո

Պարոն Պապոյան, հենց նեղն եք ընկնում՝ նախորդ 30 տարին եք հիշում, այս էլ որերորդ անգամ ասում եք՝ «այ, դուք՝ նախկիններդ, մենք ՝ նորերս» նախկինի ու նորի խնդիր չկա, որովհետև նախկինում մեխանիզմները շատ բանում այլ էին, հիմա՝ այլ են։ Այս մասին ԱԺ տնտեսական հարցերով մշտական հանձնաժողովի նիստում ասաց «Հայաստան» խմբակցության պատգամավոր Թադևոս Ավետիսյանը։

«Հիմա դուք ավելի վարժ եք այդ մանևրներում, բայց կան պարզ մասնագիտական հարցեր, որտեղ մանևրները և պոպուլիզմը չեն կարող հաղթահարել»,-ասաց նա՝ ընդգծելով, որ ճիշտ է Պապոյանը, երբ խոսում է սպառողների իրավունքների պաշտպանության մասին, բայց դա մեկ գործողությամբ չի լինում ։

«Միջնորդեք, թող ՍԱՏՄ-ն ստուգի խոշոր սուպերմարկետներում, թե որքան ժամկետն անց կաթնամթերք կա, որը թաքցում է։ Առաջին շարքում թարմն են դնում, խորքում՝ հինը։ Շատ հաճախ էլ ժամկետներն այնպես են տպած, որ անհնար է հասկանալ, «08» է, թե «06», սա էլ է ձեր լուծելիքը»։

Նշենք, որ հանձնաժողովում քննարկվում է կառավարության առաջարկությունը՝ խանութներում իրական կաթից պատրաստված և ոչ կաթից պատրաստված կաթնամթերքներն առանձնացնել, առանց կաթնային յուղի փոխարինչի կաթնամթերքը տեղադրել կանաչ, իսկ կաթնային յուղի փոխարինիչ պարունակող կաթնամթերքը՝ նարնջագույն դարակաշարում:

Պատգամավորը նշեց, որ նման առանձնացում անելու համար փոքր տնտեսվարողը տարածքի խնդիր է ունենալու։
Պապոյանն էլ պատասխանեց. «Չգիտեմ, որտեղ եք ինձ տեսել նեղն ընկած, բայց հիմա կապացուցեմ, որ եթե որևէ մեկը նեղն ընկած էլ լինի, ապա դա դուք եք լինելու վերջում։

Ասում եք՝ սպառողների իրավունքները կարևոր են, բայց փոքր խանութի համար անհնար է փոքր թուղթ տպել փակցնել։ Վերջ տվեք էլի, այս փարիսեցիությանը»։

Ավետիսյանը փորձեց միջամտել ու 2-ի միջև թեժ բանավեճ սկսվեց։

«Ստացվում է, որ «Հայաստան» դաշինքն ասում է, որ այն սպառողները ովքեր օգտվում են մինչև 100 մետր խանութներից՝ իրենց սպառողական իրավուքնները եկեք չպաշտպանենք, որովհետև ավելի լավ է 50 000 մարդ խաբվի քան 50 մարդ տանջվի՝ սպառողների իրավունքների պաշտպանության համար։ Ես եկել եմ էստեղ ՀՀ քաղաքացիների, սպառողների տեղեկացված ու չխաբված լինելու իրավունքը պաշտպանեմ։

Եթե փոքր է՝ չի նշանակում, որ կարող է ՀԴՄ չտալ, չի նշանակում, որ կարող է ժամկետնանց ապրանք վաճառի, չի նշանակում, որ կարող է սպառողին խաբել, փոքր լինելն ինդուրգենցիա չէ»,-շեշտեց Պապոյանը։

Աղբյուր` Փաստինֆո