Փաստ ինֆո

Գեր կանանց մոտ դաշտանադադարը կարող է ավելի ծանր ընթանալ, չնայած ավելորդ քաշը ուղղակիորեն չի ազդում դաշտանադադարի վրա, ասել են ռուս գինեկոլոգները: Սլացիկ կազմվածքով և գեր կանանց մոտ դաշտանադադարի տարբեր ընթացքի մասին նրանք նախազգուշացրել են «Доктор Питер» պարբերականի հետ զրույցում։

Բժիշկ-գինեկոլոգ Օլգա Ուլանկինայի խոսքով՝ տաք բռնկումները կանանց մոտ առաջանում են անկախ կազմվածքից եւ կազմվածքի տեսակից, սակայն ընդհանուր առմամբ գեր կանանց մոտ հազվադեպ է հանդիպում դաշտանադադարի համախտանիշի ծանր աստիճանը: «Հայտնի է, որ ճարպային հյուսվածքն արտադրում է սեռական հորմոններ, այդ թվում՝ էստրոգեն։ Դա կարող է ազդել ախտանիշների սրության վրա», — բացատրել է բժիշկը: Այնուամենայնիվ, նա հիշեցրել է, որ գեր կանանց մոտ տաք բռնկումները կարող են ավելի ցայտուն լինել, քանի որ ճարպային հյուսվածքը զսպում է ջերմության փոխանցումը, և ջերմաստիճանի նույնիսկ աննշան բարձրացումը զգացվում է որպես ուժեղ տաքացում:

Նրա գործընկեր Եկատերինա Վարլամովան ուշադրություն է հրավիրել այն փաստի վրա, որ դաշտանադադարն ավելի ծանր է ընթանում երկաթի պակաս ունեցող կանանց մոտ: Իսկ գեր կանանց մոտ, շարունակել է նա, մեծանում է երկաթի, վիտամին D-ի կամ օմեգա ճարպաթթուների պակասի հավանականությունը, ինչի հետեւանքով կլիմակտերիկ համախտանիշն ավելի ինտենսիվ կարտահայտվի։

«Սա նշանակում է, որ ճարպակալման դեպքում կլիմակտերիկ համախտանիշի ավելի ծանր ընթացքի ռիսկը մեծանում է։ Կարևոր է հաշվի առնել, որ գիրությունն ինքնին բեռ է մարմնի վրա, հաճախ ուղեկցվում է հիպոքսիայով և կարող է մեծացնել վեգետատիվ խանգարումները՝ ազդելով ընդհանուր առողջության և դաշտանադադարի ախտանիշների ինտենսիվության վրա», — եզրափակել է գինեկոլոգը:

Աղբյուր` Փաստինֆո