Փաստ ինֆո

Իրավական գործընթացը չպետք է խառնել քաղաքական գործընթացի հետ, ձերբակալությունը, տնային կալանքը և մյուս հարցերը իրավապահների տիրույթում է, իսկ այստեղ քաղաքական պրոցես է, նրանք քաղաքականությունից ուզել են դուրս գալ, դրա համար էլ դրել են մանդատները:

Այս մասին այսօր ԱԺ-ում լրագրողների հետ զրույցում ասաց Շիրակի մարզպետ Մուշեղ Մուրադյանը՝ անդրադառնալով Գյումրիի քաղաքապետի հրաժարականին և ավագանու «Բալասանյան դաշինքի» անդամների մանդատները վայր դնելուն, այն բանից հետո, երբ իրավապահները ակտիվորեն սկսեցին զբաղվել Սամվել Բալասանյանի ընտանիքի դեմ քրեական գործերով:

«Այդտեղ ոչ մի խնդիր չկա: Գյումրին այս պահին չունի քաղաքապետ, բայց այնպես չէ, որ քաղաքն անկառավարելի է:
Բոլորը հրաժարական չեն տվել, աշխատակազմի ղեկավարը տեղում է, աշխատանքները հնարավորինս իրականացվում են, չնայած համայնքապետ չկա: Ամեն դեպքում, այս պահին որևէ արտառոց խնդիր չկա»,-ասաց մարզպետը:

Դիտարկմանը, թե քաղաքականությունից դուրս գալու նրանց որոշումը, տարօրինակ կերպով համընկավ Սամվել Բալասանյանի որդու ձերբակալության հետ՝ Մուրադյանն ասաց, որ թեև ժամանակագրական առումով նման համընկնում կա, բայց «որպես մարզպետ՝ վստահաբար ասում եմ, որ իրավական պրոցես է, ձերբակալությունները չպետք է խառնել քաղաքականի հետ»:

Նա ընդգծեց, որշուտով ավագանին պետք է նիստ հրավիրի, որի ժամանակ պետք է համայնքի ղեկավարի թեկնածու առաջադրվի կամ չառաջադրվի, կամ նիստ լինի, կամ չլինի, որից հետո էլ դրանից բխող իրավական գործընթացները կիրականացվեն։

Աղբյուր` Փաստինֆո