Փաստ ինֆո

ՀՀ գլխավոր դատախազությունը չի արձագանքում՝ Բելգիայում ՀՀ դեսպան Տիգրան Բալայանի՝ Ադրբեջանի դեսպանից ստացած սպառնալիքներին։ Համենայն դեպս՝ «Փաստինֆո»-ի հարցմանն ի պատասխան զերծ մնացին մեկնաբանությունից։

Հիշեցնենք, որ Հայաստանի դեսպանությունը պաշտոնական բողոք է հայտնել ԵՄ-ին, Բելգիային այն բանից հետո, երբ Ադրբեջանի դեսպան Վագիֆ Սադիգովը սպառնացել է Բելգիայում Հայաստանի դեսպան Տիգրան Բալայանին, ինչի մասին հաղորդել է politico.eu-ն։ Միջադեպը տեղի է ունեցել Բրյուսելի Թանգլա հյուրանոցում ընդունելության ժամանակ, որը կազմակերպել էր Թուրքիայի դեսպանատունը երկրի ազգային օրվա առթիվ:

Ենթադրվում է, որ դա Անկարայի կողմից հովանավորվող առաջին գործողությունն էր, որին հրավիրվել էր Հայաստանի դեսպանատուն՝ 2020 թվականին Թուրքիայի և Թուրքիայի մերձավոր դաշնակից Ադրբեջանի միջև պատերազմից հետո:

ՀՀ ԱԳՆ փոխնախարար Պարույր Հովհաննիսյանը այսօր պաշտոնապես հաստատել է տեղեկությունը՝ նշելով․ «Մեզ հասած տեղեկություններով՝ ընդունելության ընթացքում վիրավորանքներ ու սպառնալիքներ են հնչել, որի վերաբերյալ հայտնել ենք բելգիական կողմին հայտագրով, ինչպես նաև Եվրամիությանը։ Այդ հարցով հետաքննում է տեղի ունենում։ Դեռևս որևէ արձագանք չկա»։ Սա, ի դեպ, հայկական կողմի առաջին և առ այս պահը միակ արձագանքն է․ ադրբեջանցի դեսպանի վարքագիծը դատապարտող հայտարարություն ո՛չ ՀՀ ԱԳՆ-ն է պաշտոնապես կատարել, ո՛չ ՀՀ կառավարությունն առհասարակ։ «Փաստինֆո»-ն կապ է հաստատել ՀՀ գլխավոր դատախազության հետ՝ մեկնաբանություն ստանալու, սակայն կառույցն առ այժմ զերծ է մնացել արձագանքից՝ խնդրելով գրավոր հարցում ուղարկել։ Հարցման պատասխանը ստանալուց հետո այն ևս կհրապարակվի

Աղբյուր` Փաստինֆո