Փաստ ինֆո

ՀՀ տարածքային ենթակառուցվածքների նախարար Գնել Սանոսյանը այսօր ԱԺ-ում լրագրողների հետ զրույցում ասաց, որ տրանսպորտային միջազգային ֆորումի շրջանակներում առիթ է ունեցել հանդիպելու թուրք գործընկերոջ հետ։

Նա նշեց, որ առիթը օգտագործելով որպես տրանսպորտային ոլորտի և ենթակառուցվածքների նախարարներ խոսել են առկա հնարավորությունների, ենթակառուցվածքների մասին, որոնք չեն օգտագործվում և օգտագործվելու դեպքում ինչ հնարավորություններ կարող են բացել երկրների և տարածաշրջանի համար։

«Խոսել ենք «Խաղաղության խաչմերուկի» մասին։ Կարող ենք գնահատել, որ բավական լավ արդյունավետ քննարկում էր»։
Հարցին, թե արդյոք գնահատվել է, թե Կարս –Գյումրի երկաթգծի գործարկումը ինչ ֆինանսական ներդրումների կարիք կլինի՝ նա նշեց, որ խոսել են բոլոր առկա ու չգործող ենթակառուցվածքների մասին, այդ թվում՝ Գյուրի-Կարս երկաթգծի մասին։ «Նախնական որոշակի պատկերացում կա, թե ժամանակային առումով որքան կարող է տևան և ինչ ֆինանսական ներդրումների կարիք կլինի, բայց հիմա չարժե դրանց վրա կենտրոնական, քանի որ դրանք նախնական դիտարկումներ են։ Եթե հասնենք այդ փուլին՝ մենք ավելի առաջ կգնանք ու դրանք արդեն նախագծի տեսք կստանան և կյանքի կկոչվեն»,-ասաց նա՝ ընդգծելով, որ այդ հարցի շուրջ առնվազն կա երկխոսություն և այդ հանդիպումն այդ երկխոսության շրջանակում էր։
«Եթե այդ ուսումնասիրություններն ու թվերը դառնան իրականա նախագծեր, ապա մենք ավելի մեծ ծավալով կներգրավվենք գործերին»,-ասաց նա։

Հարցին, թե առաջին փուլում կա կոնկրետ երկաթգիծ, որը առավել իրատեսական է համաձայնեցնել առաջին փուլում՝ Սանոսյանը պատասխանեց, որ աշխատանքները տարբեր են, բայց օրինակ Մեղիի դեպքում աշխատանքը ենթադրելու է նաև աշխատանք Երասխում, «Միաժամանակ, այն ենթադրելու է ավելի մեծ կապ ու հնարավորություն՝ թե Իրանի, թե Ադրբեջանի, թե Թուրքիայի մասով։ Այսինքն, երկու հատվածում էլ պետք է աշխատանք լինի, որ հնարավոր լինի վերագործարկել երկաթգիծը»։

Դիտարկմանը, թե այս ամենը միայն քննարկումների՞ մակարդակում են, թե կան նաև գործնական քայլեր՝ Սանոսյանը պատասխանեց, որ եթե խոսքը շինարարության մասին է, ապա շինարարություն չկա, կան քննարկումներ։

Աղբյուր` Փաստինֆո