Փաստ ինֆո

Վերջին հարցուպատասխանի ժամանակ Նիկոլ Փաշինյանը մի վտանգավոր հայտարարություն արեց, որը սպառնալիք է առ այն, որ հետագայում ևս Հայաստանը զիջելու է ադրբեջանական պահանջներին։ Այս մասին «Փաստինֆոյի» հետ զրույցում ասաց «Հայաստան» խմբակցության պատգամավոր Գեղամ Մանուկյանն՝ անդրադառնալով հայ-ադրբեջանական սահմանազատման հանձնաժողովների կանոնակարգի ուժի մեջ մտնելուն։

«Փաշինյանն ասաց, որ մենք շահագրգիռ ենք, որ ամեն սանտիմետրը Հայաստանի պետական սահմանի՝ արձանագրվի և դրա համար ամեն ինչ անելու ենք։ Դիցուք, եթե Ադրբեջանն ասի՝ եկեք Տիգրանաշենի հատվածում հայկական զինված ուժերը հետ քաշեք՝ ես գամ առաջ, այ էդտեղ էլ կճանաչեմ ՀՀ սահմանը, ըստ Նիկոլ Փաշինյանի տրամաբանության՝ ավելի լավ է Ադրբեջանը ճանաչի սահմանը, քան հայկական կողմը շարունակի տնօրինել մեզ համար ռազմավարական հատվածը։ Այստեղ է, որ մեր մտահոգությունները մնում են, որովհետև այդ կանոնակարգի ամենախայտառակ հատվածն այն է, որ սահմանազատումը լինելու է հատվածական»,- արձանագրել է գործիչը։

Դիտարկմանը, թե երբ խոսում են միակողմանի զիջումների մասին, օրինակ, Գագիկ Մելքոնյանն ասում էր, որ Բերքաբերից 900 քկմ-ից ադրբեջանցիները դուրս են եկել՝ Մանուկյանն ասաց, որ Մելքոնյանը սուտ է ասում։ «Նրա ուղեղը հասնո՞ւմ է, որ մի բան էլ խոսում է։ Հիմա Բերքաբերի անունն այս իշխանության շուրթերից չի հնչում, ավելին, Բերքաբեր վերջին այցի ժամանակ Նիկոլ Փաշինյանն անգամ բառ չասաց գյուղի օկուպացված տարածքների վերադարձի մասին, սկսեց մուննաթ գալ ու ասաց, թե ժողովուրդ, դուք ձեր ունեցածը չեք կարողանում նորմալ մշակել, էն հողերն ինչի՞ համար եք ուզում»։

Աղբյուր` Փաստինֆո