Փաստ ինֆո

4,2 մլրդ դրամ գումար է վերականգնվել։ Մեր օրենսդրությունը նախատեսում է, որ եթե հարկերն ու տույժերը վերականգնվում են պետական բյուջե, այսինքն՝ պետությանը պատճառված վնասը հատուցվում է, ապա քրեական վարույթը ենթակա է կարճման։ Ըստ էության՝ դա է տեղի ունեցել, վերականգնվել է պետությունից թաքցված հարկը, քրեական վարույթն ավարտվել է այդ հիմքով։ Այս մասին լրագրողների հետ զրույցում ասաց ՊԵԿ նախագահ Ռուստամ Բադասյանը՝ անդրադառնալով «Զովք» սուպերմարկետում իրականացված խուզարկություններին, տնօրենի ձերբակալությանը և ազատ արձակմանը, ապա՝ փոխտնօրենի՝ Աննա Հակոբյանի «հաջողակ տղամարդկանց» ընթրիքին մասնակցելուն։

Դիտարկմանը, որ եթե նախկինում գործարարները առնչություն էին ունենում իշխանությունների, նրանց ընտանիքի հետ, այսօրվա իշխանությունները, որոնք նախկինում ընդդիմադիր էին՝ քննադատում էին, ասում՝ «ճամպրուկով» փող են տանում Բաղրամյան 26, հիմա, երբ նման ընթրիքների միջոցով գումար է փոխանցվում՝ արդյոք նույն սխեման չէ՞, Բադասյանն արձագանքեց՝ նշելով, որ ՊԵԿ-ի տեսանկյունից որևէ ազդեցություն չունի, թե ինչ միջոցառումների են մասնակցում և ինչպես, ՊԵԿ-ը ցույց է տվել, որ հարկ վճարումը բացարձակ առաջնահերթություն է, հավասար վարչարարություն է իրականացնում։

«Այդ միջոցառումները համեմատելը նախկին իրականության հետ՝ անտեղի է։ Եթե միջոցառում է կազմակերպվում, որի նպատակը սկսնակ բիզնեսին օգնելն է, ապա կարծում եմ, որ շատ լավ միջոցառում է»,- ասաց նա։

Դիտարկմանը, որ մի կողմից ՝ «հարկային տեռոր է» իրականացվում բիզնեսի վրա, մյուս կողմից՝ «բիզնեսը գնում, մուծվում է Աննա Հակոբյանին»՝ Բադասյանն արձագանքեց՝ նշելով, որ որևէ կապ չի տեսնում։

Նրա խոսքով՝ եթե խնդիր տեսնեն՝ անպայման ստուգում կանեն։
«Եթե ռիսկերի համակարգն ընտրի որպես ռիսկային՝ անպայման նաև հերթական ծրագրային ստուգումը կանենք, որևէ խնդիր չկա»,- հավելեց Բադասյանը։

Աղբյուր` Փաստինֆո