Փաստ ինֆո

Նախատեսվում է, որ դեկտեմբերին ԱԺ-ում քննարկման առարկա կդառնա ՀՀ ընտրական եւ քրեական օրենսգրքերում փոփոխություն ու լրացում կատարելու մասին օրենսդրական փաթեթը, որը վտանգավոր թեզեր էր պարունակում իշխանությունն ուզուրպացված պահելու եւ բռնապետական ռեժիմ սահմանելու համար։

Աշխատանքային խումբը մասնավորապես առաջարկել էր, փաստացի, անվավեր ճանաչել ընտրությունները՝ արտակարգ կամ ռազմական դրություն հայտարարելու դեպքում, եւ տարբեր փորձագետներ մտահոգություն էին հայտնում, որ նման կառուցակարգ սահմանելու դեպքում, իշխանությունները, քվեարկության նախնական արդյունքներից դժգոհ լինելու դեպքում, կարող են արտակարգ դրություն հայտարարել ու պահել իշխանությունը։

Օրենսդրական փաթեթի քննարկումներին մասնակցող ընդդիմադիր պատգամավոր Արծվիկ Մինասյանը հաստատեց, որ նախագիծն ունեցել է խնդրահարույց ձեւակերպումներ, սակայն հաջողվել է հասնել դրանց վերանայմանը։

«Սկզբում այսպես էր շարադրված, որ եթե արտակարգ դրությունը կամ ռազմական դրությունը հայտարվել է մինչև արդյունքների ամփոփումը, ապա դադարեցվում են ընտրությունները մինչև վերանան հիմքերն, ինչից հետո նոր քվեարկություն պետք է տեղի ունենա։ Մենք առարկություն ներկայացրեցինք, աշխատանքային խումբն ընդունեց մեր առարկությունը և հիմա դրույթը վերախմբագրվում է»,- «Փաստինֆո»-ի հետ զրույցում նշեց Ա.Մինասյանը՝ ավելացնելով, որ երկու իրավիճակ է սահմանվում։

Այն է՝ մինչեւ ընտրության օրը՝ ժամը 20։00-ը արտակարգ դրություն հայտարարվելու դեպքում կասեցվում է ընտրական գործընթացը և միայն արտակարգ կամ ռազմական դրությունը վերանալուց հետո ԿԸՀ-ն կկայացնի կասեցված փուլից ընտրական գործընթացը շարունակելու կամ նոր ընտրություն նշանակելու մասին որոշում։ Այլ ընթացակարգ է առաջարկվում քվեարկության ավարտից հետո ռազմական կամ արտակարգ դրություն հայտարարվելու դեպքում։

«Եթե արտակարգ դրությունը կամ ռազմական դրությունը հայտարարվում է 20։00-ից հետո, ապա ամփոփումն անպայման պետք է լինի և եթե որևէ տեղամասում, որևէ տարածքում խնդիր կա, միայն այդ տարածքում պետք է անցկացվի նոր ընտրություն», - ասաց Մինասյանը։

Իսկ, ընդհանրապես, ներկայացված նախագծում Ա. Մինասյանն առանձնացրել է 15 խնդրահարույց կետ, որոնցից մեկով առաջարկվում է, որ ընտրություններին մասնակցելու համար կուսակցությունը պետք է ՀՀ արդադատության նախարարությունից տեղեկանք ներկայացներ՝ կանոնադրությունը «ՀՀ Կուսակցությունների մասին օրենքի պահանջներին» համապատասխանելու վերաբերյալ։ «Մեր պնդումից հետո այդ դրույթը չընդգրկվեց նախագծում»,- նշեց Մինասյանը՝ ավելացնելով, որ այդպես առիթ էր ստեղծվում իրենց ոչ ցանկայլի կուսակցությանը չգրանցելու համար, օրինակ՝ նախարարությունը չի տալիս նման տեղեկանք քաղաքական դրդապատճառներով և այլն։

Մեկ այլ խնդիր էլ արձանագրվել կուսակցությունների ֆինանսավորման հետ կապված։ Առաջարկվել է նաեւ ապաքրեականացնել, օրինակ, կուսակցությունների նվիարտուի վերաբերյալ նախատեսված հանցակազմը, եթե նվիրատվությունը գերազանցել է 2,5 մլն.-ի չափը։ «Նախ՝ առաջարկել ենք այդ 2,5 մլն-ը դարձնել 10 մլն, անշարժ գույքի դեպքում ՝ 25 մլն դրամ, ինչպես նաեւ քրեական օրենսգրքից հանել այն նորմը, որ սահմանվածից ավել նվիրատվություն անելու դեպքում պետք է քրեական պատասխանատվության ենթարկվի։Փոխարենը ավելացրել ենք, որ ավել փոխանցված գումարը 3 ամսվա ընթացքում պետք է վերադարձվի նվիրատուին կամ պետական բյուջե»,- ասաց ՀՀ ԱԺ «Հայաստան» խմբակցության քարտուղարը։

Նախքան ԱԺ նիստում օրենսդրական փաթեթի քննարկումը՝ նախատեսվում է, որ տեղի կունենան նաեւ խորհրդարանական լսումներ։

Աղբյուր` Փաստինֆո