Փաստ ինֆո

Փոխվում է հասարակական տրանսպորտի վճարման համակարգի ընդհանուր տրամաբանությունը։ Այսօր տեղի ունեցած ճեպազրույցում ասել է Երևանի քաղաքապետ Տիգրան Ավինյանը։

Նրա փոխանցմամբ՝ արտոնությունների փաթեթ են ընդունելու․ բոլոր խմբերը՝ թոշակառուները, դպրոցականները, ուսանողները և այլք, ովքեր ունեն աջակցության կարիք, կստանան արտոնություններ։

«Սա է ընդհանուր տրամաբանությունը։ Նախկին քաղաքապետը որոշակի տրամաբանություն էր տեսնում, երբ գնում էր, օրինակ, նոր ավտոբուսներ, որոնց 30-40 տոկոսն այսօր անսարք է։ Մեր՝ քաղաքային իշխանությունների տեսլականն այն է, որ հանրային տրանսպորտը գերակա է։ Մենք այլևս չենք ուզում վերադարձ ունենալ դեպի նախկին վատ համակարգեր, դեպի նախկին վատ շարժակազմեր։ Մենք չենք ուզում մաշված, վատ շարժակազմեր ունենալ ապագայում։ Միակ խնդիրը, որն ուզում ենք լուծել, հանրային տրանսպորտի որակի խնդիրն է»,-հայտարարել է Ավինյանը։

Դիտարկմանը, թե ինչպե՞ս են համակարգի փոփոխություն անելու, առանց հասարակությանը դրան պատրաստելու՝ Ավինյանը նշեց.«Նման մասշտաբի յուրաքանչյուր ռեֆորմ ունի ադապտացիոն շրջան։ Այսինքն՝ երբ որևէ մեկս ինչ–որ բանի սովորում ենք, դա որոշակի ժամանակ է պահանջում։ Մենք ինչո՞ւ ենք այս աշխատանքները սկսել 2 ամիս շուտ, որպեսզի ձեր մատնանշած այս խնդիրներն ի հայտ գան և դրանք այս ընթացքում կարողանանք լուծել»։

Քաղաքապետի վստահեցմամբ՝ ներկայիս ճանապարհը բերելու է հանրային տրանսպորտի բարելավմանը և որակի բարձրացմանը։ «Ես կրկին անգամ ներողություն եմ խնդրում պատճառած անհարմարավետության համար, վստա՛հ եղեք այս նոր մեթոդները, անկանխիկ վճարումները, բացի թափանցիկությունից ապահովելու է նաեւ տրանսպորտից օգտվելու որակը», - դիմելով երեւանցիներին ասել է Ավինյանը։

Աղբյուր` Փաստինֆո