Փաստ ինֆո

Գյումրիում «Ապրելու երկիր» կուսակցությունը պատրաստ է արտահերթ ընտրություններին։ Ավագանու խմբակցության ղեկավար Կարեն Մալխասյանը «Փաստինֆոյի» հետ զրույցում ասաց, որ կուսակցությունում քննարկել են հարցը և որոշում կայացրել մասնակցել դրանց։

Դիտարկմանը, թե այսօր ԱԺ նախագահ Ալեն Սիմոնյանը նշում էր, որ ընտրությունները կարող են տեղի ունենալ հաջորդ տարվա գարնանը կամ տարվա կեսերին՝ Մալխասյանը անհասկանալի համարեց նման ժամկետի մատնանշումը։ «Եթե հետևենք օրենքի պահանջներին, ապա ընտրությունները պետք է տեղի ունենան դեկտեմբերի վերջին կամ հունվարի սկզբին։ Ավելին՝ օրենքը չի կարգավորում ժամանակավոր պաշտոնակատար նշանակելու հարցը։ Հետևաբար, ամենախելամիտ տարբերակը, որը բխում է օրենքից, դա արտահերթ ընտրություններ անցկացնելն է»,- ասաց նա։

Մալխասյանն ընդգծեց, որ եթե համայնքի ավագանին չի կարողանում ընտրել համայնքի ղեկավար, ապա օրենքի համաձայն, առավելագույնը 40 օրվա ընթացքում պետք է նշանակվեն արտահերթ ընտրություններ։ «Հիմա հարցը հետևյալն է, եթե կառավարությունը մտադիր է հաջորդ տարվա կեսերին անցկացնել արտահերթ ընտրություններ, ապա ինչպե՞ս է կառավարվելու քաղաքը։ Օրենքը նախատեսում է ավագանու լուծարունից հետո՝ 30-40-օրյա ժամկետ՝ նոր ընտրությունների անցկացման համար։

Այստեղ կարևոր հանգամանքն այն է, որ քաղաքը պետք է կառավարվի՝ ընտրված իշխանությունների կողմից։ Սա ամենակարևոր բանն է»,- արձանագրեց ավագանու անդամը։

Հարցին, թե ինչպես է գնահատում քաղաքում ստեղծված իրավիճակը՝ Մալխասյանն ասաց, որ իրենք կատարվածի մասին հետևություններ արել են, բայց առայժմ չեն ցանկանա գնահատականներ տալ հատկապես ՔՊ-ի գործողություններին, այլ կգերադասեն հետևել հաջորդական քայլերին։

Անդրադառնալով Բալասանյան դաշինքի անդամների մանդատները վայր դնելուն՝ նա նշեց, որ որևէ ուժ իրավունք չուներ քաղաքը կանգնեցնել ճգնաժամի առաջ։ «Իրենք պատասխանատու էին քաղաքի համար, իսկ եթե իրենց վրա ճնշումներ կային, ապա պետք է բարձրաձայնեն դա, պետք է հիմնավորումներ ներկայացնեն, թե ինչի համար են գնացել այդ քայլին, մինչդեռ մինչև հիմա որևէ հիմնավորում չենք լսել»,-ասաց «Ապրելու երկրի» ներկայացուցիչը։

Նշենք, որ «Բալասանյան դաշինքի» անդամները մանդատները վայր դրեցին, երբ իշխանությունները հայտարարեցին դաշինքի ղեկավար Ս. Բալասանյանի ու նրա որդու նկատմամբ հարուցված քրեական հետապնդման մասին։

Աղբյուր` Փաստինֆո