Փաստ ինֆո

«Ձեր ապիկար կառավարման պատճառով բեռը մի՛ դրեք քաղաքացու վրա, կրճատեք ձեր պարգևավճարները, փողը տեղը դրեք», - Երևանի քաղաքապետարանի իշխանություններին դիմելով ասել է Երևանի ավագանու «Մայր Հայաստան» ընդդիմադիր խմբակցության անդամ Մեսրոպ Մանուկյանը։

Նա հիշեցրե՛ց, որ Հայկ Մարությանի պաշտոնավարման օրոք «Թել-Սել»-ի հետ պայմանագիր է կնքվել՝ միասնական տոմսերն ապահովելու համար, առնվազն 200 նմանատիպ ավտոբուսներում պետք է տեղադրվեին սարքեր՝ կոնկրետ ժամկետներում, բայց չէր արվել եւ «Թել-Սելի»-ի հետ պայմանագիրը խզվել էր։ Քաղաքապետի Ժամանակավոր պաշտոնակատար Հրաչ Սարգսյանը նույն ընկերության հետ կնքել էր պայմանագիր ավելի ուշ։

Երեւանի ավագանու անդամը քաղաքի կառավարիչներին մեղադրեց կոռուպցիոն սխեմային մասնակցության համար։
«Տղերք, փա՛յ եք այս կոռուպցիոն սխեմայի մեջ», ֊ ասաց Մանուկյանը՝ ավելացնելով, որ այսօր պարտադրում են միայն 100 դրամանոց օգտագործել։ «Այս սարքավորումը տեղադրելով չէի՞ն գիտակցում, որ մենք այլ դրամներ ևս ունենք, նաև թղթադրամ, հիմա կայանման վայրում կան սարքեր, որոնք մանր են տալիս, դժվա՞ր էր նման սարք տեղադրիելը։Այս սարքերը Հրաչ Սարգսյանի հետ ընկերություն անող Ռուբոյի ընկերությունն է տեղադրել, ով նաև Նիկոլ Փաշինյանի աշխատակազմի ղեղավարի տեղակալ Զարուհի Մաթևոսյանի ամուսինն է», - ասաց ավագանու անդամը՝ դրա մեջ փոխկապակցվածության շղթա տեսնելով։

Նա նշեց նաև, որ «ԹԵԼ-ՍԵԼ»-ը չի կատարել պայմանագրով նախատեսված կետը, ըստ որի սարքերը պետք է աշխատեին նաև բանկային քարտերով։ Ավագանու անդամը կոչ արեց քաղաքացիներին. «Նոյեմբերի 1-ին բանկային քարտերով բարձրացե՛ք ավտոբուս, փորձեք այդ քարտով վճարում անել, եթե չստացվի, ասացեք, որ չեք վճարում, նաև այլ գումար տվեք, եթե չվերցնի վարորդը, մի վճարեք», - ասաց Մանուկյանը։ Նա նաև հիշեցրեց, որ 100 դրամանոց ունենալու պարտադրանքը ՀՀ արժույթի մասին օրենսդրության խախտում է։

Աղբյուր` Փաստինֆո