Փաստ ինֆո

Լևոն Քոչարյանին 6-7 հոգով են բերման ենթարկել։ Դատական նիստում տուժող ճանաչված ոստիկան Հրաչիկ Խաչատրյանն այս մասին հայտարարեց՝ նշելով, որ միայնակ դժվար կարողանար, 6-7 հոգով են բերման ենթարկել, որովհետև Լևոն Քոչարյանը ֆիզիկապես պինդ էր։

«Փաստինֆո»-ի հաղորդմամբ՝ Երևանի ընդհանուր իրավասության քրեական դատարանում՝ դատավոր Կարեն Ֆարխոյանի նախագահությամբ, ընթանում է ՀՀ ԱԺ պատգամավոր Լևոն Քոչարյանի և Սերգեյ Ասատուրովի գործով դատական նիստը, որի ընթացքում ցուցմունք տվեց տուժող ճանաչված ոստիկան, լեյտենանտ Հրաչիկ Խաչատրյանը։

«Երբ իջանք, երթի մի մասը եկավ դեպի մեր ուղղությամբ։ Սկսեցինք բերման ենթարկել։ Մենք հասարակական կարգ էինք պահում, երթևեկելի հատվածով շարժվում էր երթը»,- ասաց տուժողը՝ նշելով, որ ինքը երկուսի է բերման ենթարկել, երկրորդը՝ Լևոն Քոչարյանն էր․ «Սկզբում փորձեցի բերման ենթարկել Սերգեյ Ասատուրովին, բայց չկարողացա, որովհետև ինքն էր մեզ բրդում, քաշում, մնացած ժողովուրդն էլ՝ իրեն էր հետևից քաշում։ Հետո փորձեցինք բերման ենթարկել Լևոն Քոչարյանին, ընկավ գետնին մի պահ, փորձում էինք հանել, երկու անգամ ոտքից հարվածեց, իրեն մի կերպ տարանք գազել ավտոմեքենան, չստացվեց, հետո որոշեցինք մեր մյուս մեքենան նստացնել»։ Տուժողը նշեց, թե դժվար կկարողանար բերման ենթարկեր Լևոն Քոչարյանին միայնակ, Լևոն Քոչարյանին 6-7 հոգով են բերման ենթարկել։

Հանրային մեղադրող Արթուր Դանիելյանի՝ ուղղորդող հարցադրմամբ, թե ինչու են 6-7 հոգով բերման ենթարկել, պատճառը ոտքերով, ձեռքերով հարվածելն էր, տուժողը նշեց, որ պատճառն այն էր, որ սկզբում քաղաքացիները քաշում էին նրան․ «Բացի այդ, Լևոն Քոչարյանը ֆիզիկապես պատրաստված էր, դրա համար 6-7 հոգով բերման ենթարկեցինք, որ ավելի հեշտ բերման ենթարկեինք»։ Դատախազի հարցին ի պատասխան ոստիկանը հայտնեց, որ ինքը ցավ զգացել է, որը հետո անցել է։

Ոստիկանը նշեց, որ իր նկատմամբ ճնշումներ չեն եղել, ցուցմունքում ինչ ասել է՝ ճիշտ է ասել։

Լևոն Քոչարյանը տուժողին հիշեցրեց, որ վերջինիս զեկուցագրում նշված է, որ օրինական պահանջ է նշվել, ապա հետաքրքրվեց՝ երբ է ներկայացրել և ինչ օրինական պահանջ է ներկայացրել, ինչին արձագանքելով ոստիկանը նշեց, որ օրինական պահանջ անձամ ինքը չի ներկայացրել, այլ ոստիկան է ներկայացրել, ինչքան գիտի՝ բարձրախոսով, անձամբ ինքը չի լսել, որ մոտենան և ներկայացնեն պահանջ, միևնույն ժամանակ՝ չի հիշում, որ տեսանյութերով տեսած լինի, որ բարձրախոսով օրինական պահանջ ներկայացված լինի։ Հարցին՝ արդյո՞ք գործունեությանը խոչընդոտել համարվում է, եթե մարդը մոտենում և հարցնում է՝ ինչ եք անում, ինչու եք բերման ենթարկում, ոստիկանը պատասխանեց, որ դա այնքան էլ խոչընդոտում չէ։ Պաշտպանության կողմը հետաքրքրվեց՝ «տարեք սրան» արտահայտությունը բավարար է ենթակայի համար, որ բերման ենթարկեն անձին, ոստիկանը նշեց, որ չի հիշում, որ նման բան լինի, բայց եթե նման բան կա, ուրեմն տվյալ մարդը մի բան արել է։ Լևոն Քոչարյանի ճշգրտող հարցերին, թե ինքն ինչ ձևով է ընկած եղել, երբ իրեն փորձել են բարձրացնել՝ բերման ենթարկելու համար, ոստիկանը մանրամասնեց․ «Մեջքի վրա՝ գետնի վրա ընկած էիք։ Ես էլ՝ Ձեր ոտքերի դիմացի հատվածից։ Փորձել եմ ձեռքերից բարձրացնել, այդ ժամանակ հարվածեցիք ոտքերիս, այդ ժամանակ՝ ոտքերից փորձեցի բարձրացնել»։ Հարցին՝ եթե այդ ժամանակ կողքին այլ ոստիկաններ էին, որոնք ավելի հարմար դիրքով էին, ինչու այդ ձևով բարձրացրին, ոստիկանն ասաց՝ «Բոլորով փորձում էինք բարձրացնել և բերման ենթարկել»։ Թե ինչ սկզբունքով են որոշում՝ որ դեպքում ընկած մարդուն բարձրացնել, մյուս դեպքում՝ ոտքերով հարվածել՝ ոստիկանն ասաց, թե ինքը ոտքերով չի հարվածել, ինչ վերաբերում է Սերգեյ Ասատուրովին, ապա՝ չի հիշում։ Պաշտպանության կողմն ընդգծեց, որ Խաչատրյանը պարտավոր է պատասխանել հարցերին և հայտնել իրեն հայտնի ամբողջ տեղեկությունը, մինչդեռ, 10 վայրկյանի տարբերությամբ իրադարձություններից վերջինս տեղեկությունը չի հիշում։ Ոստիկանը նաև պնդեց, թե Լևոն Քոչարյանի նկատմամբ խեղդող հնարք չի կատարել, պարանոցի մոտ եղել է, բայց խեղդող հնարք չի կատարել, նա նաև «չհիշեց», թե կոնկրետ ինչպես և ինչ դիրքով է պարանոցի հատվածից քաշել։

Տուժող ճանաչված Հրաչիկ Խաչատրյանի հարցաքննությունը կշարունակվի նոյեմբերի 21-ին, ժամը 16։30-ին։

Հիշեցնենք, որ 2023թ․ սեպտեմբերի 22-ի ոստիկանության ծառայողները դաժան ծեծի ենթարկելով բերման են ենթարկել անհնազանդության ակցիաներին մասնակցող Լեւոն Քոչարյանին։ Վնասվածքների հետևանքով Լևոն Քոչարյանը տեղափոխվել էր հիվանդանոց։ Նույն օրը հայտնի դարձավ, որ Լ. Քոչարյանը ձերբակալվել է՝ ոստիկանության 4 ծառայողի՝ «բերետավորի», նկատմամբ իբրև բռնություն գործադրելու համար։ Վարույթն իրականացնող մարմինը մեղադրանք է ներկայացրել, ապա՝ կալանավորման միջնորդությամբ դիմել դատարան, որը բավարարվել է։ Լևոն Քոչարյանն ազատ է արձակվել կալանքից՝ ԱԺ պատգամավոր դառնալուց հետո։ Նախաքննության ավարտական փուլում Լևոն Քոչարյանի մեղադրանքը փոփոխվել է։ Մեղադրանք է ներկայացվել նաև Սերգեյ Ասատուրովին։

Հեղինակ՝ Իզաբել Սահակյան

Աղբյուր` Փաստինֆո