Փաստ ինֆո

Վերջին վեց տարում Ցեղասպանության ճանաչման հետ կապված ինչ տեղի է ունեցել, եղել է Հայ դատի, ազգային կուսակցությունների, անհատների աշխատանքի շնորհիվ։ Իրենք ոչինչ չէին էլ անում, ուղղակի հայտարարել, որ ոչինչ չեն էլ անելու, դա արդեն ցինիզմի գագաթնակետն է։ Այսինքն՝ ՀՀ ԱԳ նախարարը ՀՀ ԱԺ շենքում հայտարարում է, որ Ցեղասպանության ճանաչման հարցը օրակարգային առաջնահերթություն չէ, դրան ինչ ասես կարող է հետևել։ Այս մասին լրագրողների հետ զրույցում ասաց ԱԺ «Պատիվ ունեմ» խմբակցության ղեկավար Հայկ Մամիջանյանը՝ անդրադառնալով Արարատ Միրզոյանի հայտարարությանը։

« Դա դավաճանության հասնող ցինիզմ է։ Դա արդեն մեկ նոտա չի, է, երգ է։ Եթե մեկ նոտա լիներ, կարող է այդքան չնյարդայնանայի։ Որևէ կերպ ՀՀ ինքնիշխան տարածքներն օկուպացված, ասում են՝ դրա հետ կապված բան չենք անելու, նորմալ է, ադրբեջանցիներ են, եկել և նստել են։ Գերիների մասով ասում է՝ կսպասենք, խաղաղության պայմանագրի մեջ գերիների հետ կապված բան չկա,․ տրանսպորտային ապաշրջափակման մեջ չկա, Ցեղասպանությունն օրակարգից հանում է։ Դա արդեն նոտաներ չէ, երգ է»,- ասաց Մամիջանյանը։

Դիտարկմանը, որ ասում են՝ առաջնահերթություն չէ, դա չի նշանակում, որ ոչինչ չեն անում, Մամիջանյանը նշեց․ «Իբր, որ վեց տարի առաջնահերթություն էր, ի՞նչ են արել։ Խնդիրը քաղաքական մեսիջն է, որը փոխանցվում է Թուրքիային, միջազգային հանրությանը»։

Մամիջանյանը նշում է, թե արդեն դժվար է պատկերացնում, թե հաջորդիվ էլ ինչ ազգային օրակարգերից են հրաժարվելու իշխանությունները, գուցե նրանք դիմեն ՅՈՒՆԵՍԿՕ-ին՝ ասելով, որ պետք չի պաշտպանել հայկական մշակութային կոթողները։

Աղբյուր` Փաստինֆո