Փաստ ինֆո

Ապօրինի զենք, զինամթերք պահելու, կրելու կասկածանքով Ոստիկանության կողմից բաժիններ են տեղափոխվել 9 անձ, որոնցից երկուսը՝ մեկ օր առաջ, մյուսները՝ հոկտեմբերի 30-ի ուշ երեկոյան։ Այս մասին «Փաստինֆոյին» հայտնեց Քննչական կոմիտեի մամլո խոսնակ Գոռ Աբրահամյանն՝ անդրադառնալով տարածվող տեղեկատվությանը, որ ոստիկանությունը նախօրեին 9 անձ է ձերբակալել քաղաքական բովանդակության թռուցիկներ տարածելու գործով։

Աբրահամյանը հայտնել է, որ այդ անձինք, ինչպես նաև համապատասխան հաղորդումները ներկայացվել են ՀՀ ՔԿ ԵՔՔՎ տարբեր վարչական շրջանների քննչական բաժիններ։ «Հաղորդումների առթիվ նախաձեռնվել են քրեական վարույթներ՝ ՀՀ քրեական օրենսգրքի 335-րդ հոդվածի հատկանիշներով։ Այդ անձանց նշված կասկածանքով ձերբակալելու որոշումներ են կայացվել, նրանք գտնվում են արգելանքի տակ։ Իրականացվում են անհրաժեշտ քննչական, վարութային գործողություններ՝ հանգամանքները պարզելու համար։

Հարցին, թե այդ անձանց մեքենաներում զննությամբ զենք չհայտնաբերելուց հետո ինչո՞ւ քաղաքացիներին ազատ չեն արձակվում՝ Աբրահամյանը պատասխանեց. «Իրականացվում են անհրաժեշտ քննչական, վարութային գործողություններ՝ հանգամանքները պարզելու համար»։

Վերոհիշյալ 9 անձանցից 2-ի փաստաբան Հովհաննես Խուդոյանը «Փաստինֆոյի» հետ զրույցում ասաց, որ իր տեղեկություններով 9 հոգից որևէ մեկի նկատմամբ այս պահին որևէ մեղադրանք չկա։

«Վստահորդներիս մասով կարող եմ ասել, որ նրանք հարցաքննվել են, մեքենան զննության է ենթարկվել ու զննությամբ ոչինչ չի հայտնաբերվել, արդյունքում, անգամ զենքի կասկածանքը վերացնելուց հետո էլ անձինք ազատ չեն արձակվել։ Իրենց մոտ անհանգստություն է առաջացրել թռուցիկներ հայտնաբերելու հանգամանքը»։

Փաստաբանն ընդգծեց, որ բոլորի մոտ նույն սցենարն է գործում, ավելին, միայն անցած 3 օրերի մասին չէ խոսքը, նախկինում է եղել են նման դեպքեր, որոնք արագ լուծվել են, բայց սցենարը շարունակական է։

«Այստեղ երկրորդ կարծիք լինել չի կարող, միանշանակ, սա քաղաքական հետապնդում է։ Այս պարագայում էլ կասկածանքը ակնհայտ անհիմն է, իսկ հիմնական մտահոգությունը քաղաքական բովանդակությամբ թռուցիկներն են։ Այլ մեկնաբանություն չի կարող լինել։ Ավելին, ձերբակալված բոլոր անձինք ուղղակիորեն կապված են վերջին ամիսների «Սրբազան շարժման» հետ, հետևապես այլ տրամաբանություն փնտրել պետք էլ չէ։ Եթե 1-2 դեպք լիներ՝ կարող էր զուգադիպություն լինել, բայց 8-9 դեպքն արդեն օրինաչափություն է»։

Նա նաև ընդգծեց, որ նման թռուցիկների օգտագործումը որևէ վարչական իրավախախտում չի կարող համարվել ու դա պատճառ չի կարող լինել քրեական հետապնդման։ «Սա բռնապետական պետությանը բնորոշ գործիքակազմ է և նպատակ ունի վախ տարածելու, մարդկանց քաշքշելու, գործերից կտրելու, հետագա գործունեության համար սահմանափակում մտցնելու, քանի որ մեկ անգամ այս քաշքշուկի մեջ ընկած անձը կարող է մտահոգություն ունենալ հետագա գործունեությունը շարունակե՞լ, թե՞ ոչ»,-ասաց փաստաբանը։

Աղբյուր` Փաստինֆո