Փաստ ինֆո

Այս պահին իրականացնում ենք ուսումնասիրություններ և մշտադիտարկումներ շուրջ 50 պետական կառավարման համակարգի մարմիններում, որոնցից 1/3-ը ուսումնասիրություններ են, որոնք իրականացվում են վարչապետի հանձարարությամբ, մնացածը՝ մշտադիտարկումներ: Այս մասին լրագրողների հետ զրույցում ասաց ՊՎԾ ղեկավար Ռոմանոս Պետրոսյանը։

«Այս պահին իրականացնում ենք մշտադիտարկում 20 խոշորագույն պետական ընկերություններում, որտեղ պետությունն ունի 50 և ավելի բաժնեմաս: Մենք այդ ընկերություններում նախորդ տարվա ֆինանսական փաստաթղթերում ուղղումներ ենք նկատել և ծախսագրումների նվազեցման, եկամուտների աճի ֆոնին խնդիր է առաջացել: Պետության շահաբաժինների 50 տոկոսը, որ պետք է փոխանցվի պետական բյուջե, այդտեղ անճշտություններ ենք հայտնաբերել, որոնց ընդհանուր գումարը մոտ 800 մլն դրամ է: Մոտ 427 մլն ծախսերի նվազեցումներ էին արվել, և 460 մլն դրամի լրացուցիչ շահաբաժին էր գոյացել, որը պետք է վերականգնվի բյուջե: 40 մլն դրամն արդեն վերականգնված է»,- ասաց նա։

Ինչ վերաբերում է պետական գնումների գործընթացին, ապա նա նշեց, որ խնդիրն այն է, որ գնումների տեխնիկական պարամետրերում, երբ հստակ նշված չի լինում գնվող ապրանքի տեխնիկական պարամետրերը, դա մեծ սողանցք է թողնում անբերախիղճ մատակարարների համար, որոնք գնային մեծ սեգմենտի մեջ գերշահույթ ստանալով մատակարարում են նվազագույն որակ ունեցող սարքեր կամ պիտույքներ:

Ռոմանոս Պետրոսյանը նաև խնդրահարույց համարեց մեկ անձից գնումները, սակայն չհամաձայնեց, որ գործող իշխանության գրեթե բոլոր գնումները մեկ անձից են կատարվում։ Նրա խոսքով՝ եռամսյակային կտրվածքով պետական կառավարման համակարգում իրականացվում է շուրջ 2800-3000 հանրային գնում:

«Մեկ անձից գնումները այդ ծավալի մեջ չնչին տոկոս են կազմում: Մենք իրավասու ենք վերահսկելու հանրային գնումների ոլորտն ամբողջությամբ, եւ մեկ անձից գնումների մասով վերհանված խնդիր եթե ունենում ենք, մենք բնականաբար, առաջարկներ ենք ներկայացնում տվյլ մարմիններում՝ լավարկելու գնման գործընթացը»,-ասաց նա:

Աղբյուր` Փաստինֆո