Փաստ ինֆո

Այն, ինչին հիմա ականատես ենք լինում Գյումրիում, միանշանակ, իշխանության զավթում է։ ՔՊ-ն պարտրաստվում է 2026-ի ընտրություններին ու մինչ այդ փորձում է իրենով անել նաև հանրապետության երկրորդ քաղաքն՝ իր մեծությամբ։ Այս մասին «Փաստինֆոյի» հետ զրույցում ասաց գյումրեցի կառավարման փորձագետ Արթուր Գևորգյանը։

«Սա իշխանության ուզուրպացիայի օրինակ է։ Եթե քաղաքն ունի ընտրված իշխանություն, բայց նրանց հասցնում են հրաժարականի, ապա, միանշանակ, ակնկալիք ունեն այդ իշխանության ուզուրպացիայի։ Այստեղ երկրորդ կարծիք լինել չի կարող»,- ասաց փորձագետը։

Նա հիշեցրեց, որ Գյումրիում դեռ 2021 թ-ի ընտրությունների ընթացքում ակնհայտ կար իշխանություն-ընդդիմություն բախում և «Բալասանյան դաշինքը» հավասարակշռող միավոր էր։ «Ամեն ինչ սկսվեց «Քաղաքացիական պայմանագրի» կողմից «Բալասանյան դաշինքի» հետ դաշինքը խզելուց ու դրանից հետո գնացին հարաբերությունների լարման»։

Ա.Գեւորգյանի դիտարկմամբ՝ Սամվել Բալասանյանի հետ կապված քրեական գործը, որն առկա էր արդեն տևական ժամանակ, օգտագործելով փորձում են ինչ-որ հանգուցալուծման տանել։ «Ալավերդու դեպքերից հետո մենք վստահ էինք, որ ՔՊ-ն նաև Գյումրիում է փորձելու նույն սցենարով գնալ և իր իշխանությունը վերահաստատել, բայց Ալավերդուց հետո տեղի ունեցան Երևանի ընտրությունները և դեպքերի տրամաբանությունը փոխվեց, քանի որ որ ՔՊ-ի իշխանությունը թուլացած էր, իսկ Գյումրիում նոր ընտրությունների արդյունքները շատ բարդ կլիներ կանխատեսել, ուստի պրոցեսները առկախվել էին»։

Իշխանական ռեսուրս, որը հստակ կքվեարկի ՔՊ-ի օգտին, ըստ նրա, Գյումրիում չկա։ «Վարչական ռեսուրսը, որին տիրապետում էր «Բալասանյան դաշինքը», այս ուժի բիզնեսները, շրջապատը՝ բավական են ասելու համար, որ ՔՊ-ին այստեղ կողմ չեն քվեարկի։ Ավելին՝ ՔՊ-ն Գյումրիում ստեղծել է մի միջավայր, որ ընտրված քաղաքապետը, ով իրականում քաղաքում որոշակի աշխատանքներ էր իրականացնում, հրաժարական տա։

Հետևաբար վստահ կարող եմ ասել, որ այնպես չէ, որ Նիկոլն էսօր եկավ ասեց՝ Գյումրին մերն է՝ քաղաքն իրենցը կդառնա։ ՔՊ-ն Գյումրիում կանգնելու է լուրջ խնդրի առաջ՝ թե իրավական, թե հեղինակության առումով, քանի որ այստեղ ամեն դեպքում կա ընդգծված ընդդիմադիր զանգված, կան ընդգծված ընդդիմադիր անհատներ։ Գիտեք նաև, որ Գյումրիում կան տարբեր կլաններ, թիմեր, որոնք տարիներ շարունակ պայքարի մեջ են եղել, ու հիմա նրանց ռեսուրսները ևս ավելացել են»,- ասել է Գեւորգյանը։

Հստակեցմանը, թե ասվածը վկայո՞ւմ է, որ Գյուրիում հիմա ընտրություններ կազմակերպվելու դեպքում ՔՊ-ն չի հաղթելու՝ Գևորգյանն ասաց, որ ամեն բան կախված է նրանից, թե մեկնարկային կետը որը կլինի։ «Հիմա հարցն այն է, թե ինչ ճանապարհով կգնա իշխանությունը, և երբ կկազմակերվեն այդ ընտրությունները։ Ամեն դեպքում՝ օրինակ, Երևանի ավագանու ընտրություններին ընտրողների միայն 7 տոկոսն է ընտրել ՔՊ-ին։ Ամենատարբեր հարցումները վկայում են, որ ՔՊ-ն այժմ չունի վարկանիշ, ավելին ունի հակավարկանիշ։ Գյումրին 2018 թ-ի Գյումրին չէ, ունի կայացած միջին խավ, ունի անհատներ, որոնք իրենց դերակատարությունները ավելացրել են քաղաքային կյանքում, նրանց ռեսուրսները ավելացել են։ Վստահաբար կարող եմ ասել, որ 2024-ի Գյումրին թե իշխանությունների, թե ընդդիմության համար «սև արկղ» է ու բոլորին այստեղ անակնկալ է սպասվում»։

Աղբյուր` Փաստինֆո