Փաստ ինֆո

Հակակոռուպցիոն դատարանում՝ դատավոր Վահե Դոլմազյանի նախագահությամբ, այսօր կայացել է ՀՀԿ փոխնախագահ Արմեն Աշոտյանի և մյուսների գործով դատական նիստը։

Նիստի ընթացքում հայտնի դարձավ, որ դատարանը Պրոբացիայի ծառայությունից ստացել է գրություն, համաձայն որի՝ Արմեն Աշոտյանի անվամբ ֆեյսբուքյան էջերից գրառումներ են արվել, ինչպես նաև՝ Աշոտյանը զրուցել է լրագրողների հետ։ Արմեն Աշոտյանն էլ հիշեցրեց, որ երբ դատարանն իր նկատմամբ խափանման միջոց էր ընտրվել տնային կալանքը, ինքը հետաքրքրվել էր, թե արդյոք շարունակվելու է հնարավորությունը իր՝ լրատվամիջոցներով հոդվածներ տպագրելու, թե ոչ, արդյոք կարող է պատասխանել լրագրողների հարցերին, արդյոք հնարավորություն է ունենալու դատական նիստերի դահլիճից՝ ավտոմեքենա քայլելու ընթացքում պատասխանելու լրագրողների բլից հարցերին, դատարանն էլ դիրքորոշում էր հայտնել, որ տնային կալանքը չի կարող առավել խիստ լինել քան կալանքը ՔԿՀ-ում, ուստի՝ ինքը շարունակել է հոդվածներ գրել, պատասխանել լրագրողների բլից հարցերին։ Ինչ վերաբերում է ֆեյսբուքյան էջին, ապա Աշոտյանը պարզաբանեց, որ իր պաշտոնական օգտահաշվում որևէ հրապարակում չի արվել իր կալանավորման պահից, մյուսը՝ էջն է, որը աշխատել է մշտապես և որին մուտք ունեն իրենից բացի ևս մի քանի անձ։

«Կարո՞ղ եմ արդյոք քաղաքացիների հետ 5 հարցուպատասխան ձևաչափով կրկին շփվել կամ ճեպազրույց տալ նիստից հետո: Չի կարող տնային կալանքի ռեժիմն ավելի խիստ լինել, քան քրեակատարողական հիմնարկում գտնվելունը: Դուք էլ, պատվարժան դատարան, բազմիցս ասել եք այդ մասին»,- ասաց Արմեն Աշոտյանը:

Նախագահողը նշեց, որ դատական նիստերի դահլիճից դուրս ճեպազրույց տալ չի կարող, չի կարող շփվել որևէ մեկի հետ, բացի պաշտպաններից, ԱԺ պատգամավորներից ու մերձավոր ազգականներից: Քաղաքացիների հետ հարցուպատասխանի ձևաչափը նույնպես կարող է շարունակվել:

Հաջորդ նիստը կկայանա նոյեմբերի 8-ին՝ ժամը 10:30-ին: Այդ օրը կշարունակվի Անի Ռափյանի հարցաքննությունը:

Հիշեցնենք, որ քրեական վարույթի շրջանակներում կալանքի տակ է ՀՀԿ փոխնախագահ Արմեն Աշոտյանը։ Արմեն Աշոտյանի նկատմամբ հնարավոր հետապնդում հարուցելու հարցը լայն տարածում ստացավ հատկապես 2022 տարվա վերջերին, երբ ԵՊԲՀ նախկին ռեկտոր Միքայել Նարիմանյանի նկատմամբ քրեական հետապնդում հարուցվեց՝ դեռեւս 2015 թ. համալսարանից խոշոր չափերի ենթադրյալ հափշտակության առթիվ հարուցված քրեական գործի շրջանակներում։ Դեռևս այդ ժամանակ մամուլը գրել էր, որ Նարիմանյանին ձերբակալելու հիմնական նպատակն Արմեն Աշոտյանի դեմ ցուցմունք կորզելն էր։ 2022թ. նոյեմբերի 16-ի կեսգիշերին Արմեն Աշոտյանին «Զվարթնոց» օդանավակայանում թույլ չեն տվել մեկնել ՀՀ-ից՝ պատճառաբանելով, թե նա մեղադրյալ է։ Նույն օրը երեկոյան Արմեն Աշոտյանը հրավիրվել է ՀՀ ՔԿ, որտեղ նրան մեղադրանք է առաջադրվել պաշտոնեական լիազորությունները չարաշահելու և փողերի լվացման հատկանիշներով։ Նրա նկատմամբ որպես խափանման միջոց է կիրառվել բացակայելու արգելքը։ Արմեն Աշոտյանը 2023 թվականի հունիսից մինչև 2024թ․ սեպտեմբերի 11-ը կալանքի տակ է գտնվել։ Դատարանը Աշոտյանի նկատմամբ որպես խափանման միջոց է կիրառել տնային կալանքը և գրավը՝ 25 մլն դրամի չափով։

Հեղինակ՝ Իզաբել Սահակյան

Աղբյուր` Փաստինֆո