Փաստ ինֆո

ՀՀ ԱԺ պատգամավորներ Տիգրան Աբրահամյանը, Արծվիկ Մինասյանը, Դավիթ Կարապետյանն ու Դավիթ Դավթյանը դիտարկել են Վրաստանում նախօրեին տեղի ունեցած խորհրդարանական ընտրությունների քվեարկության ընթացքը: ՀՀ ԱԺ «Հայաստան» խմբակցության քարտուղար Արծվիկ Մինասյանը «Փաստինֆո»-ին հայտնեց, որ դիտարկել են հիմնականում Մցխեթայի և Թբիլիսիի մի շարք ընտրատեղամասերը, որտեղ ընդհանուր առմամբ իրավիճակը հանգիստ է եղել, թեև արձանագրել են մի շարք խնդիրներ։

Մասնավորապես, որոշ ընտատեղամասերում տեսախցիկներ չեն հանդիպել, ինչը նրանց կարծիքով կարող էր հանգեցնել սադրանքների, ավելորդ լարվածության։ «Որոշ ընտատեղամասերում տեսախցիկներ չկային, ինչը կարող էր հանգեցնել սադրանքների, ավելորդ լարվածության, սակայն նկատել ենք լարվածություն տեղամասերից դուրս` համենայն դեպս մեր դիտարկած շրջաններում», - ասաց նա` նշելով, որ «Պատիվ ունեմ» խմբակցության քարտուղար Տիգրան Աբրահամյանի հետ այս պահին գտնվում են հայկական Խոջիվանք գերեզմանատանը:Հարգանքի տուրք են մատուցում հայ մեծերին:

Ըստ նրա` Վրաստանում այս պահին առերևույթ լարվածություն փողոցներում չկա, պարզապես հայտարարությունների մակարդակով է: Ընդդիմությունը հայտարարել է լայնածավալ ակցիաների մասին, որոնք ամենայն հավանականությամբ կմեկնարկեն ավելի ուշ:

Մեր խորհրդարանական դիտորդական առաքելությունը երեկոյան կվերադառնա Երևան: Ավելի վաղ հայտել էինք, որ Վրաստանի ԿԸՀ-ն հայտնել է, որ ընտրությունները կայացած են ու դրա նախնական արդյունքներով հաղթել է իշխող ուժը` ստանալով 54 % քվե, 5 % շեմը հաղթահարել են նաև ընդդիմադիր ուժերը, բայց նրանց ձայների ընդհանուր թիվը հասնում է մոտ 37 %-ի:

Աղբյուր` Փաստինֆո