Փաստ ինֆո

«Վրաստանում տեղի ունեցածը չի կարելի դիտարկել պարզունակ՝ Արևմուտք-ՌԴ հակադրության համատեքստում», - «Փաստինֆո»-ի հետ զրույցում նման կարծիք հայտնեց քաղաքագետ Սուրեն Սուրենյանցը: Ինչպես արդեն հայտնել ենք, նախօրեին Վրաստանում տեղի են ունեցել խորհրդարանական ընտրություններ, որոնց արդյունքներով հաղթել է իշխող ուժը` ստանալով ընտրողների մոտ 54 տոկոսի վստահության քվեն:

Ընդդիմադիր մի քանի ուժ, որոնք ընդգծված արեւմտամետ են,  հաղթահարել է հինգ տոկոսի արգելքը, բայց ընդհանուր հանրագումարը կազմում է միայն  37տոկոս:

Ս.Սուրենյանցի դիտարկմամբ` արևմուտքը պետք է տարբերակել  արևմտյան լիբերալ շահախմբերից: «Եթե խոսում ենք արևմտյան  լիբերալ շահախմբերի մասին, ապա նրանք Վրաստանում պարտվեցին:Նույն արևմուտքի երկրներում այս պահին մենք տեսնում ենք, որ պայքար է գնում լիբերալ շահախմբերի և այն ուժերի միջև, որոնք ուզում են փոխել ստատուս քվոն:Նույն բանը տեղի ունեցավ Վրաստանում`՝ լոկալ մակարդակով», - ասաց Ս. Սուրենյանցը` ավելացնելով, որ Վրաստանը չի հայտարարել,որ հրաժարվում է եվրաինտեգրումից,այլ ասում է, որ ինքը Եվրաինտեգրման դիմաց չի պատրաստվում վճարել որպես գին, այն հեռանկարը, որ երկիրը դառնա ՌԴ դեմ ֆորպոստ, այլ խոսքով, համաձայն չէ  ՌԴ-ին տարածաշրջանից դուրս բերելու համար դառնալ հակամարտության թատերաբեմ:Մարդիկ չեն ուզում այդ գնով դառնալ ԵՄ անդամ, բայց դա չի նշանակում, որ իրենք եվրոպական ձգտումներից հրաժարվել են»:

Քաղաքագետի խոսքերով` Վրաստանում հաղթեցին բալանսավորված արտաքին քաղաքականության կողմնակից այն ուժերը, որոնք ռեգիոնից դուրս փրկիչներ չեն փնտրում:

«Ինչպես ուզում եք իրենց կոչեք իրենց՝ ազգային, պետականամետ, կամ այլ կերպ, բայց երբ այս ամենն ասում ենք Հայաստանում պսեվդոարևմտամետները մեզ կոչում են ռուսատրուկ կամ ռեգիոնալիստ, բայց դրանից էությունը չի փոխվում»,- ասաց Սուրենյանցը:

Ըստ քաղաքագետի` ՌԴ-ն Վրաստանի այդ մոտեցմանն ու ընտրությունների արդյունքներին դրական կվերաբերվի, որվհետև հավասարակշռված իշխանության հետ միշտ ավելի հեշտ է գործ ունենալ: Իսկ թե ինչ անդրադարձ կունենա դա Հայաստանի վրա, ընդհանրապես տարածաշրջանի վրա,  կհենվի՞ արդյոք ՌԴ-ն Վրաստանի վրա ու ի՞նչ կփոխվի դրանից ՀՀ համար` «Փաստինֆո»-ի հարցին ի պատասխան Սուրենյանցը նշեց, որ պետք է այստեղ էլ տարբերենք խոսքը Հայաստանի՞, թե՞ Նիկոլ Փաշինյանի մասին է:

«Մերձիշխանական շրջանակներում չեն թաքցնում,որ իրենք ցանկանում են տեսնել,այսպես կոչված, կոլեկտիվ Սահակաշվիլու թիմի հաղթանակը Վրաստանում,բայց Հայաստանի համար շատ կարևոր է,որ Վրաստանում լինի այնպիսի իշխանություն,որը բալանսավորված արդյունավետ հարաբերություններ ունենա ՌԴ և Արևմուտքի հետ,որովհետև լոգիստիկ առումով մեզ ձեռնտու ու շահեկան է Վրաստանի միջոցով հարաբերվել ՌԴ-ի և արևմուտքի հետ,հետևաբար, այս էլեկտորատ պատկերը,որ գրանցվել է Վրաստանում Հայաստանի շահերին միանգամայն ներդաշնակ է», - եզրափակել է գործիչը:

Աղբյուր` Փաստինֆո