Փաստ ինֆո

Իշխանության յուրացման ենթադրյալ նախապատրաստման փորձի վերաբերյալ քրեական վարույթով, որի շրջանակներում մեղադրյալի կարգավիճակում են նաև «Սև Հովազ» ՌՀՀԿ-ի նախագահ, արցախյան պատերազմների մասնակից Սերոբ Գասպարյանը , արցախցի Արմեն Մնացականյանը, որպես վկա ներգրավված Արսեն Ավետիսյանը «Factor TV»-ի հետ զրույցում պատմել է, թե իրենց խաբելով տարել են «Արբատ» խմբավորումների բազա, որտեղ իրեն պետք է նախապատրաստեին, որ իրենք դառնան տեռորիստ, հարձակվեն կառավարության, ԱԺ, դատախազության շենքերի վրա, բոլորին «մորթեին», որ իշխանությունը վերցնեն։ Այլ մանրամասներ պատմելով՝ վկան ասել է, թե երկու շաբաթ մնացել է, ապա՝ իմացել, թե ինչ նպատակ են հետապնդում, անմիջապես հեռացել է, շատերն են ցանկացել դուրս գալ, սակայն ծեծել են այդ անձանց։ Վկան լրատվամիջոցի հետ զրույցում նշել է, թե անմիջապես դիմել է ոստիկանապետին, որն արձակուրդում էր և այդ պատճառով կապ է հաստատել ԱԱԾ-ի հետ։ Վկան նաև չի մոռացել շեշտել, որ իրականում իր շնորհիվ է բացահայտվել դեպքը, ոչ թե՝ ՔՊ-ական պատգամավոր Արմեն Խաչատրյանի, որի անունն ակտիվորեն շրջանառվում էր մամուլում՝ որպես հաղորդում ներկայացրած անձ, ինչի մասին «Փաստինֆո»-ին հայտնել էին նաև Սերոբ Գասպարյանի պաշտպանները։ Վկան «Factor TV» -ի հետ զրույցում նաև ահազանգել է, որ իրեն վտանգ է սպառնում, սակայն իր անվտանգությունը չի ապահովվում։ Նշված վկայի հայտարարություններին արձագանքելով՝ «Փաստինֆո»-ի հետ զրույցում արցախցի Արմեն Մնացականյանի պաշտպան Ռոման Երիցյանն ասել է, որ նրա հայտարարությունները բացարձակ սուտ են, հեքիաթ։ Նա նշել է նաև, որ կոնկրետ Արմեն Մնացականյանի մասով նման վկա չկա։ Սերոբ Գասպարյանի վերաբերյալ նման ցուցմունքներ, ըստ Գասպարյանի պաշտպանական թիմին հասանելի նյութերի, ևս չկան։ Գործով նման վկա, այդուհանդերձ իրապես կա։
Ինչ վերաբերում է անվտնագության հարցով վկայի մտահոգություններին, ապա ՔԿ մամուլի քարտուղար Գոռ Աբրահամյանը «Փաստինֆո»-ի հետ զրույցում ասաց, որ իր նկատմամբ պաշտպանության միջոց կիրառելու վերաբերյալ համապատասխան առաջարկություն արվել է անձին, սակայն վերջինս հրաժարվել է օրենքով սահմանված պաշտպանության միջոցներից և ներկայացրել է օրենքից դուրս միջոցներ ձեռնարկելու պահանջներ, որոնք, բնականաբար մերժվել են։ Հարցին՝ արդյոք վկան չէր զգուշացվել՝ նախաքննական գաղտնիք չհրապարակելու պահանջի մասին, արդյոք այդտեղ նման խախտում առկա չէ, Աբրահամյանը պատասխանեց՝ նշելով, որ հետևում են։

«էական խախտում արձանագրվելու դեպքում անհրաժեշտ իրավական արձագանք կլինի»,- ասաց Աբրահամյանը։

Հիշեցնենք, որ ՔԿ-ն սեպտեմբերի 18-ին հայտարարել է՝ իշխանության յուրացման նախապատրաստման ենթադրյալ դեպքի մասին։ Ըստ ՔԿ-ի՝ շուրջ երեք տասնյակ խուզարկությունների, հարցաքննությունների արդյունքում՝ բավարար փաստական տվյալներ են ստացվել, որ ՀՀ քաղաքացիներ Ս.Գ.-ն, Ա.Ե.-ն, Ա.Հ-ն, Ե.Ս.-ն, Ա.Ս-ն, ինչպես նաև ԼՂ նախկին բնակիչներ Ա.Մ.-ն Ա.Ս.-ն, ինքնությունները դեռևս չպարզաբանված այլ անձանց հետ նախնական համաձայնությամբ, խմբի կազմում, կատարել են իշխանությունը յուրացնելու նախապատրաստություն, այն է՝ դիտավորությամբ ստեղծել են ՀՀ իշխանությունը զավթելու՝ բռնություն գործադրելու և բռնություն գործադրելու սպառնալիքի միջոցով ՀՀ կառավարության լիազորություններին տիրանալու համար պայմաններ, ինչի համար նշված անձինք, նախնական համաձայնությամբ, ՀՀ իշխանությունը զավթելու նպատակով, վարձատրության՝ յուրաքանչյուրին ամսական շուրջ 220.000 ՌԴ ռուբլի վճարի դիմաց, ՌԴ-ում եռամսյա հավաքներ անցնելու և դրա ընթացքում նոր ծանր զինատեսակներին ծանոթանալու, դրանց կիրառման հմտություններ ուսանելու, ապա ՀՀ վերադառնալուց հետո մարտական հերթապահություն իրականացնելու, ինչպես նաև գիտելիքները այլ անձանց փոխանցելու պատրվակով, 2024 թվականի ընթացքում հավաքագրել են ՀՀ մի շարք քաղաքացիների և Լեռնային Ղարաբաղի մի շարք նախկին բնակիչների: Քրեական վարույթի շրջանակներում երեք անձ կալանավորվել է, յոթ անձի նկատմամբ քրեական հետապնդում է իրականացվում։ Կալանավորված անձանց թվում Սերոբ Գասպարյանն է, արցախցի Արմեն Մնացականյանը, որը Ռոստովից ՀՀ էր ժամանել՝ եղբորորդու զոհվելու տարելիցին մասնակցելու նպատակով։

Հեղինակ՝ Իզաբել Սահակյան

Աղբյուր` Փաստինֆո