Փաստ ինֆո

Ջ․ Բայդենի նամակի մեսիջը այն էր, որ Հայաստանն ու Ադրբեջանը պետք է փոխզիջումների ճանապարհով հասնեն խաղաղության։ ԱՄՆ-ն հզոր երկիր է և յուրաքանչյուր խոսք, որ այնտեղից է հնչում՝ Հայաստանի և Ադրբեջանի նման փոքր երկրներում շատ ավելի ծանրակշիռ է ընկալվում։ Բայդենին նաև Հայաստանի ու Ադրբեջանի միջև խաղաղության փաստաթուղթ է անհրաժեշտ, քանի որ, եթե կարողանա այստեղ հաջողության հասնել, ապա կհերքի Թրամփին և գոնե մեկ արտաքին հաջողություն կգրանցի։ «ՓաստԻՆֆոյի» եթերում ասել է կովկասագետ, տարածաշրջանի հարցերի փորձագետ, «Հայկական նախագիծ» գիտակրթական ՀԿ համահիմնադիր Կարեն Իգիթյանը։

Անդրադառնալով բանակցային հարթակներին, բանախոսը հստակեցրեց, որ պետք է հասկանանք, թե որ հարթակներում են հասել այն իրականությանը, որում այսօր հայտնվել ենք։ Կար մի փաթեթ, որը ընդունվել էր Ռուսաստանի, Հայաստանի և Ադրբեջանի կողմից, սակայն այլևս գոյություն չունի, քանի որ չկա Արցախը։ Կար մեկ այլ փաթեթ, որը տրամադրեց Արևմուտքը և հանգեցրեց Արցախի կորստին։

Բանախոսի դիտարկմամբ, Իրանի, Ռուսաստանի և Թուրքիայի դերը տարածաշրջանում շատ մեծ է։ Օրինակ, եթե խոսքը «Զանգեզուրի միջանցք»-ի մասին է, ապա Թուրքիան այն ցանկանում է, Իրանը չի ցանկանում, Ռուսաստանն էլ ցանկանում է վերահսկել այն։ Այս պարագայում նրանք խանգարում են միմյանց։ Իսկ երկկողմ բանակցությունների դեպքում խանգարողներ չկան։ Թուրքիան միևնույնն է բանակցությունների մեջ է, քանի որ որտեղ կա Ադրբեջան՝ այնտեղ է նաև Թուրքիան։
Սահմանազատման կանոնակարգի առնչությամբ փորձագետը նշեց, որ ռուսերեն տեքստը տարբերվում է հայերենից, քանի որ բառեր կան, որոնք հոմանիշ չեն, գուցե թարգմանվում են, բայց ուղիղ իմաստը նույնը չէ։ Եղել են դեպքեր, երբ բանակցությունների ժամանակ էական է եղել, թե որ փաստաթղթում ինչ լեզվով, ինչ բառ պետք է գրվի։ Կարող ենք ենթադրել, որ լուրջ հետևանքներ կարող են ունենալ այն տարբերությունները, որոնք կան տեքստերի մեջ։ Տեսքտը գաղտնի է պահվում միայն Հայաստանի ժողովրդից։

Անդրադառնալով Ադրբեջանի հնարավոր հարձակման վերաբերյալ կանխատեսումներին, կովկասագետը նշեց, որ պատերազմը միայն Ալիևից և Փաշինյանից կախված չէ, իսկ դա նշանակում է, որ պրոցեսը շարունակվում է և հնարավոր է, որ խուսափենք պատերազմից։ Բայց ակնհայտ է, որ Ադրբեջանը հարձակման ցանկություն ունի։ Իսկ «Զանգեզուրի միջանցք»-ը, կոպիտ ասած, աշխատելու է, բայց դա չի ֆիքսվելու որպես Ադրբեջանի տարածք։

Մանրամասները՝ տեսանյութում։

Աղբյուր` Փաստինֆո