Փաստ ինֆո

Որևէ ամբուլատորիա կամ բուժակ մանկաբարձական կետ առաջնային օղակում չի փակվում, հակառակը, մենք դիտարկում ենք հեռավոր և շատ բնակչություն ունեցող գյուղերում, որտեղ չի եղել բուժակ մանկաբարձական կետ՝ ավելացնել։ Այսինքն, սահմանել բուժքույրերի հերթապահություն։

Այս մասին ԱԺ-ում հայտնեց ՀՀ առողջապահության նախարարի տեղակալ Արտակ Ջումայանը՝ անդրադառնալով «Հայաստան» խմբակցության պատգամավոր Արման Ղազարյանի հարցին, թե արդյոք Գեղարքունիքի մարզի հեռավոր համայնքների ամբուլատորիաները օպտիմալացնելու մտադրություն ունի կառավարությունը։

Ջումայանը պատասխանեց, որ օպտիմալացումը ենթադրում է կազմակերպաիրավական առումով խոշորացում միայն։ «Այսինքն, գյուղական մի քանի ամբուլատորիա դառնում են մեկ իրավաբանական անձ, տարանջատվում է տնօրենի պարտականությունը, որն այսօր զուգահեռ իրականացնում է տվյալ ամբուլատորիայի ընտանեկան բժշկի պարտականությունները, տնօրենի համար սահմանում ենք հատուկ պայման, թե ինչով պետք է զբաղվի, իսկ ընտանեկան բժշկին ազատում ենք տնօրենի պարտականություններից»։

Ղազարյանն ասաց, որ այդ բուժամբուլատորիաները ժամանակին կառուցվել են ՀԲ-ի ֆինանսավորմամբ։ «Պատկերացնո՞ւմ եք, հեռավոր գյուղում ընտանեկան բժիշկը ստանում է 80-100 հազար դրամ գումար, իսկ ձեր առաջարկած տնօրենին ավելի շատո գումար եք տալու, էդ ծրագիրը կյանք է կոչվել ՀԲ-ի շնորհիվ և շատ լավ աշխատում է, ինչ նպատակո՞վ եք ուզում այդ կայացած հիմնարկը քանդել ու միավորել, ինչպես համայնքները միավորեցիք, իսկ դրա արդյունավետությունը 0 է։ Մարդիկ փողը դրել են՝ նորմալ աշխատում են, բանուգործ չունե՞ք, սկսել եք եղածը քանդել»։

Ջումայանը նշեց, որ կան ամբուլատորիաներ, որ սպասարկում են 3000-5000 բնակչույթուն, դրանք չեն ամրագրվում են ու չեն կցագրվում հիվանդանոցներին, ամբուլատոիաները մնում են իրենց մեջ։

«Սակայն մենք նաև ունենք մարզերում 1700-1800 հոգանոց համայնքներ սպասարկող ամբուլատորիաներ։ Այդքան քիչ բնակչություն ունեցող ամբուլատորիայի համար գնումներ կազմակերպելը շատ բարդ է, խոշորացումը հնարավորություն կտա ֆինանսական առումով տնտեսումներ անել»։

Աղբյուր` Փաստինֆո