Փաստ ինֆո

Ազգային ժողովում այսօր երկրորդ ընթերցմամբ քննարկվում է «Սոցիալական աջակցությունների մասին» նոր օրենքի նախագիծը, որով առաջարկվել են սահմանել և կարգավորել սոցիալական աջակցության ոլորտի, սոցիալական ծառայությունների նոր տեսակներ, օրինակ՝ ընտանիքի կենսապահովման կայունացման օգնությունը, սոցիալ-հոգեբանական օգնությունը, բնակարանային կոմունալ ծառայությունների վճարումների նվազեցումը կամ հատուցումը, սոցիալական պատրոնաժը, ինտեգրմանը կամ վերաինտեգրմանն ուղղված օգնությունը, կենցաղային օգնությունը:

Նախագծի հարակից զեկուցող ՔՊ-ական պատգամավոր Լիլիթ Ստեփանյանը նշեց, որ հաճախ մտահոգություն են հնչում այն մասին, որ հատկապես այն դեպքերում, երբ սոցիալական աջակցություն ստացող ընտանիքի երեխան դուրս է մնում աջակցությունից, սա հիմք է, որ դադարեցվի նպաստի տրամադրման գործընթացը։

«Մինչեռ, Հայաստանի, ինչպես նաև միջազգային փորձը ցույց է տալիս, որ ծայրահեղ աղքատությունը կամ առհասարակ աղքատությունը կարելի է կրճատել միայն կրթության միջոցով հետևաբար, եթե աղքատ ընտանիքի երեխան, դուրս է մնում հանրակրթությունից կամ առհասարակ կրթությունից, ապա սա ցուցիչ է, որ այս ընտանիքը շարունակելու է մնալ սոցիալական ծանր պայմաններում։

Ավելին, եթե սոցիալական անապահով ընտանիքի կամ առհասարակ ընտանիքի երեխան դուսր է մնում կրթությունից կամ հանրակրթությունից, ապա դա ամենևին չի նշանակում, որ հիմնական պատճառը կոշիկի կամ հագուստի բացակայությունն է, բազմաթիվ են դեպքերը, երբ երեխաներին նույն ընտանիքի անդամները կամ ծնողները երեխային դպրոց սովորելու կամ մանկապարտեզ ուղարկելու փոխարեն՝ այլ տեղեր են ուղարկում, մասնավորապես, երեխան ստիպված է լինում զբաղվել մուրացկանությամբ»,-ասաց պատգամավորը։

Աղբյուր` Փաստինֆո