Փաստ ինֆո

«Հայաստան» խմբակցության պատգամավոր Գեղամ Մանուկյանն այսօր կառավարության հետ հարցուպատասխանի ընթացքում ասաց, որ որոշել է դատարկաձեռն չգալ ու ցույց տվեց այն վայրի նուռը, որ բերել էր 2010-ին՝ Արցախի Տիգրանակերտի պեղումների վայրից։

«Չեմ ուրացել այս նուռը, չեմ մոռացել հայրենի Տիգրանակերտը, չեմ դավաճանել այս ամենին»,-ասաց նա՝ հարցնելով, որ եթե պատմական Հայաստանն այդքան մերժելի է՝ Մյունխենում Ալիևի հետ բանավեճի ժամանակ ինչո՞ւ էր Փաշինյանը հիշում Տիգրան Մեծի թագավորությունը։ «Ի դեպ, իրական Հայաստանի մասին, որ խոսում եք՝ ասեք, որ իրական Հայաստանի մաս է նաև Ներքին Հանդը»։

Նա նաև շեշտեց, որ Մհեր Գրիգորյանն ընդունել է, որ սահմանազատման հարցով կան ռիսկեր, որ կարող է ինչ-որ հատվածից հետո սահմանազատումը կարող է չլինել։ «Նորից եմ ձևակերպում հարցը. Արդյոք կառավարությունը գնահատել է այդ ռեսկերը, որ դիցուկ, Ադրբեջանի պահանջով կկուն էլի որևէ ձագ տալու դեպքում՝ հաջորդ անգամ Հայաստանից օկուպացված որևէ հատված, օրինակ, Ներքին Հանդում պատճառ կբերեն, որ սոսիների պուրակի ամբողջականության համար եկեք օկուպացված Ներքին Հանդի այդ հատվածը հանձնենք Ադրբեջանին կամ Ադրբեջանն առհասարակ հրաժարվի Ներքին Հանդի, Ջերմուկի, Գեղարքունիքի, Սարուշենի հետ կապված բանակցությունները շարունակել»։

Նիկոլ Փաշինյանը պատասխանեց, որ ռիսկերի առկայությունը ոչ ոք չի հերքել։

«Ինչո՞ւ ենք մենք սահմանազատման գործընթացը՝ ռիսկերով հանդերձ, համարում դրական, որովհետև համարում ենք, որ սահմանազատման գործընթացի բացակայության ռիսկերը 100-ապատիկ և 1000-ապատիկ ավելի են»,-ասաց նա՝ ընդգծելով, որ այդտեղ ընդհանրապես բանավեճ չկա։  «Հարցը հետևյալն է, այդ կանոնակարգի կետերը տալի՞ս են հնարավորություն այդ ռիսկերը գնահատել՝ այո տալիս են»։

Նա նաև կրկին ցուցադրեց ՀՀ-ի քարտեզն՝ ընդգծելով  բոլոր հարցերի պատասխանները այդ քարտեզն է ու ընդգծեց, որ ՀՀ-ի որևէ միլիմետր տարածք սակարկման ենթակա չէ։

 Անդրադառնալով պատմական Հայաստանին՝ Փաշինյանն ասաց, որ պատմական Հայաստանի կոնտեքստը երկար ժաանակ գերիշխող է եղել առնվազն ՀՀ 95 տոկոս մարդկանց մոտ։ «Խոսքը ոչ թե պատմության ժխտման մասին է, այլ այն մասին, թե ինչպիսի սոցիալ-հոգեբանական վերանայումներ պետք է արվեն մեր պետության հարատևությունն ապահովելու համար։ Տիգրան Մեծը՝ մեր Տիգրան Մեծն է, մեր պատմությունը՝ մեր պատմությունն է, մենք այդտեղ բանավեճ չունենք։ Մեր բանավեճը ապագայի տեսլականի մասին է»։

Մանուկյանը կրկին հարցրեց, թե որտե՞ից այդ վստահությունը, որ Հայաստանը ինչ-որ փուլում չի կանգնելու դառը իրողության առաջ, երբ Ջերմուկում կամ Ներքին Հանդում, երբ Ադրբեջանի հետ քաշվելու հարցը լինի՝ բանակցությունները կանգ չեն առնի։

Փաշինյանը պատասխանեց, որ վստահությունը լեգիտիմության մեջ է։ «Չնայած Հայաստանի 200 քկմ օկուպացված է՝ մենք համարում ենք, որ այսօր վավերացված կանոնակարգը տալու է և տալիս է բոլոր հնարավորությունները խաղաղ բանակցային ճանապարհով ՀՀ ինքնիշխան տարածքի ամբողջականությունն ապահովելու»։

Անդրադառնալով քարտեզներին՝ նա նշեց, եթե ուզում ենք մի ամբողջական քարտեզ, ապա Աժ նիստերի դահլիճի առաստաղը կարող է չհերիքել, որ այդ ամբողջական քարտեզը փակցնեն։ «Սահմանազատման քարտեզը դասագրքի ատլաս չի, այլ տասնյակ էջեր ունի և ես ասում եմ, որ մենք բոլոր այդ քարտեզները, որոնցով ամրագրվում են ՀՀ սահմանները, ունենք»։

Աղբյուր` Փաստինֆո