Փաստ ինֆո

Ակնհայտ է, և դա նաև երևաց Տավուշի սահմանը վերարտադրելու ժամանակ, որ սահմանին ինչ-որ տեղեր մենք ենք առաջ, ինչ-որ տեղեր իրենք։ Երբ սահմանը սահմանազատված ու սահմանագծված չի՝ այդ խնդիր կա։ Այս մասին այսօր լրագրողների հետ զրույցում ասաց ՀՀ ԱԺ նախագահ Ալեն Սիմոնյանն՝ անդրադառնալով հարցին, թե արդյոք վտանգավոր չէ նախօրեին իր արած հայտարարությունը, որ տեղեր կան, որտեղ հայկական կողմն է առաջ, ինչը կարող է ադրբեջանցիներին փաստարկ տալ, որ հայերն իրենք են ընդունում, որ որոշ հատվածներում Ադրբեջանի տարածքներում են գտնվում:

«Առնվազն Տավուշում 2 եռանկյունի կա, որտեղ իրենց եռանկյունին գտնվում է մեր տիրապետության տակ, իսկ մերը՝ իրենց մասում է գտնվում: Դա ոչ մեկի համար գաղտնիք չէ: Իմ ասածը հետևյալն է. բոլոր այն տեղերում, որտեղ իրենք են առաջ, իրենք պետք է հետ գնան, բոլոր այն տեղերում մենք ենք առաջ, մենք պետք է հետ գնանք: Մերը՝ մերն է, իրենցը՝ իրենցն է»,-ասաց Սիմոնյանն՝ ընդգծելով, որ կոնկրետ տեղանքների մասով տեղեկություններ չունի, թե որ հատվածում ինչպիսին է իրավիճակը: «Ակնհայտ է մի բան, որ իրենք 200 քկմ –ի չափով մեր տարածքում»։

Անդրադառնալով իր հայտարարությանը, թե ադրբեջանական զորքերի՝ ՀՀ տարածքից դուրս գալը «մանրուք» է՝ նա նշեց, որ իրենք հիմնական նպատակը խաղաղություն հաստատելն է և մեր 29 743 քկմ-ն արձանագրելը ու սահմանը վեր հանելն է: «Ես դա մանուրք չեմ համարում, ես ասում եմ, որ գլոբալ պատկերի մեջ մենք պետք է գլոբալ հարցերին անդրադառնանք, որովհետև շատ կարևոր հարցեր կան, որ ներառված չեն խաղաղության պայմանագրում: Դու երբևիցե չես կարող բոլոր հարցերը ներառել: 30 տարվա ընթացքում այդ հարցերը 100-ավոր են ու դրանցից ոչ մեկը չի կարելի մանրուք համարել, բայց այսօր գլխավոր նպատակը սահմանը վերարտադրելն է և խաղաղության պայմանագիր կնքելը: Դրանից հետո մեր քաղաքացիները մեր հարևանների հետ առևտուր են անելու, փոխայցեր են անելու ու բոլոր հարցերը լուծվելու են»:

Աղբյուր` Փաստինֆո