Փաստ ինֆո

44-օրյա պատերազմի նախօրեին խնջույք կազմակերպելու դրվագով մեղադրվող Սևակ Աբրահամյանի տնային կալանքի ժամկետը երկարացվել է։ Այս մասին «Փաստինֆո»-ի հետ զրույցում ասաց փաստաբան Արման Թամրազյանը։

Շուրջ երկու տարի ընթացող դատաքննության ընթացքում այս պահին դատակոչված 51 վկայից դեռ հինգ վկա է հարցաքննվել, այդ թվում՝ ԳՇ նախկին պետ Օնիկ Գասպարյանը, դիվիզիայի հրամանատարը։ Փաստաբան Թամրազյանը համոզված է՝ վկաների ցուցմունքներով արդեն իսկ փլուզվել է մեղադրանքը, քանի որ այն այնքան անհեթեթ է, որ պարզապես ապրել չի կարող։ Տնային կալանքի ժամկետը երկարացնելու որոշման դեմ բողոք պաշտպանն արդեն ներկայացրել է, պաշտպանը պնդում է՝ խոչընդոտման հավանականության հիմքով խափանման միջոցն ընտրվում է, բայց ինչպես միշտ՝ որևէ որոշմամբ նշված չէ, թե որ վկայի վրա կարող է ազդեցություն գործադրել։

«Չկա որևէ վկա, որի ցուցմունքը հակասում է Սևակ Աբրահամյանի ցուցմունքի հետ, չի կարող որևէ վկայի վրա ազդեցություն գործադրել, որովհետև իմաստ չկա։ Բացի այդ, հարձակման պահին հակառակորդի գործողությունների վերաբերյալ կան տեսաձայնագրություններ, առաջնագծում տեղադրված տեսախցիկներն ամեն ինչ արձանագրել են։ Եթե վկան ցուցմունքով ասում է, որ տեսել է՝ հակառակորդը 20 տանկով գրոհում է կամ կուտակել է, ապա տեսագրությունով երևում է, որ, պայմանական, 3 հետևակի մարտական մեքենա էր։ Պատշաճ քննություն նաև այդ հակասությունների մասով չի իրականացվել»,- ասաց փաստաբանը։

Հիշեցնենք, որ Արցախի Մարտակերտի շրջանի Թալիշ և Մատաղիս գյուղերի պաշտպանությունը պատշաճ չկազմակերպելու մեղադրանքով բարձրաստիճան սպա էր կալանավորվել: Ըստ մեղադրանքի՝ հրամանատար Սևակ Աբրահամյանը պատերազմի մեկնարկի նախորդ օրը բանակի շուրջ 100 սպաների մասնակցությամբ կազմակերպել է խնջույք, որի ընթացքում թեև տեղեկատվություն է ստացել, որ առաջնագծում հակառակորդի կուտակումների կան եւ պատերազմի վտանգը մեծ է, անձնակազմին մարտական պատրաստություն չի բերել եւ ոչինչ չի արել հակառակորդի հարձակումը կանխելու, դրան դիմագրավելու համար:

Բացի այդ` գնդապետը հարձակման պահին նույնպես չի կատարել իր պարտավորությունները, անգործություն է դրսեւորել, ինչի հետեանքով ադրբեջանական կողմը ժամերի ընթացքում կարողացել է ճեղքել պաշտպանական գիծն ու մխրճվել թիկունքային հատվածներ: Այդ պայմաններում հայկական կողմը չի կարողացել պաշտպանության անցնել, ինչը հանգեցրել է նրան, որ ադրբեջանական կողմը գրավել է գերիշխող բարձունքները եւ հրամանատարական դիտակետերը, մխրճվել պաշտպանության խորքը` զորամասի անձնակազմին ստիպելով նահանջել: Դրա հետևանքով հակառակորդի վերահսկողության տակ են անցել Մարտակերտի շրջանի Թալիշ եւ Մատաղիս գյուղերը: Քրեական գործն ի սկզբանե գտնվել է Սյունիքի մարզի ընդհանուր իրավասության դատարանի դատավոր Մուշեղ Արամյանի վարույթում, ապա տեղափոխվել Երևան և այժմ գտնվում է դատավոր Արտուշ Գաբրիելյանի վարույթում։ Դատաքննության ընթացքում Սևակ Աբրահամյանի խափանման միջոց կալանքը փոխարինվել է տնային կալանքով։

Հեղինակ՝ Իզաբել Սահակյան

Աղբյուր` Փաստինֆո