Փաստ ինֆո

Ներողություն խնդրելու մեջ ոչ մի վատ, վախենալու բան չկա, բայց ներողություն խնդրող մարդը պետք է իրեն մեղավոր ճանաչի և զգա, որ արարք է արել, որը պետք չէր անել։ Երբ գալիս եք ու շատ հանգիստ տոնով բարոյախրատական բաներ եք ասում՝ ուզում եմ հարց տալ, երբ ձեր խմբակցության ղեկավար Սեյրան Օհանյանը լսումների ժամանակ ամբիոնում ելույթ ունեցող որոշ բանախոսներ սեռական բնույթի հայհոյանքներ են հնչեցնում՝ էդ հորդորն իրեն արե՞լ եք, թե՞ ոչ։ Այս մասին Ազգային ժողովում ի պատասխան «Հայաստան» խմբակցության քարտուղար Արծվիկ Մինասյանի ներողություն խնդրելու պահանջին՝ ասաց ԱԺ նախագահ Ալեն Սիմոնյանը։

«Սեյրան Օհանյանը Ձեր կարծիքը կիսո՞ւմ է, թե ոչ։ Սա ձե՞ր կարծիքն է, թե խմբակցության։ Եթե խմբակցության կարծիքն է, ապա դրան պետք է հետևեք։

Ձեր գործընկեր տիկին Կյուրեղյանը, որը հայտնի է ամենադատապարտելի և փողոցային տարբերակով մտքեր արտահայտելով՝ ոչ միայն այս դահլիճում, այստեղից դուրս գալուց հերթական բանն է իրեն թույլ տվել, որին ի պատասխան ես արձագանքել եմ և միշտ արձագանքելու եմ»,-ասաց նա՝ դժգոհելով, թե «որոշ էակներ», ովքեր ընդդիմության կողմնակիցներն են, գիշերը իր ու իր ընտանիքի անդամների նկարներն են փակցնում փողոցում ու հայհոյանքներ են գրում իրենց հասցեին։

«Դրանց ինչ-որ կերպ արձագանքե՞լ եք։ Ստանդարտները երկակի չեն լինում, «քամի ցանողը փոթորիկ է հնձելու», առաջին օրից դուք դա իմ վարքագծից իմացել եք»,-ասաց Սիմոնյանը։

Արծվիկ Մինասյանն էլ արձագանքեց, թե Սիմոնյանը լավ տոնով էր սկսել, բայց տխրեցնող հայտարարությամբ ավարտեց։
«Դուք Սահմանադրական պարտականություն ունեք, ու դա ձեզանից պահանջում է խորհրդակցություն հրավիրել, քննարկել իրավիճակը, որ լարվածությունը չանցնի անթույլատրելիի սահմանները։ Դուք դա չեք արել, ու չեք անում, հակառակը հոխորտում եք այս ամբիոնից։

Ենթադրենք, վաղը էտ միկրոֆոնը ձեզ մոտ չի լինելու, թիկնազորը չկա, այս դահլիճից դուրս եք գալու հանրության մեջ, որտեղ ոչ մեկ կողքից ու թևերից չի բռնի, բայց այդ մարդկանց հետ պետք է շփվեք չէ՞։

Հիմա բողոքում եք հանրային արձագանքից, իհարկե, անընդունելի է, բայց այդ պահավածքը, որ դուք եք ցուցաբերում այստեղից, բա դրա պատասխանը ո՞նց եք տեսնում։ Ասում եք՝ սեռական բնույթի հայհոյանքներ են հնչեցվում, իսկ էս ձախ կողմից ինչպիսի՞ արտահայտություններ են լինում, գոնե մեկ անգամ մեծամասնության պատգամավորների պահվածքը դատապարտե՞լ եք։ Ասե՞լ եք՝ չի կարելի։

Ակնկալում էի, որ ձեր մեջ այդ կամքը կգտնեք ու ներողություն կխնդրեք, բայց դա չարեցիք, դե չեք անում՝ Աստված ձեզ հետ»։
Ալեն Սիմոնյանը կրկին մոտեցավ ամբիոնին ու հայտարարեց, որ ինքը միշտ իրերն իրենց վանունով է կոչել ու հետագայում էլ է նույն կերպ վարվելու։

«Ձեր արածներին նայեք, հետո եկեք որևէ մեկին բարոյախրատական դասեր տվեք։ Ձեր խոսում քողարկված սպառնալիք հնչեցրեցիք, զգուշացնում եմ՝ սպառնալիքով ինձ հետ մի խոսեք, դա հակառակ արձագանք է ունենում, եթե ուզում եք նորմալ խոսել՝ օրինակ ծառայեք»։

Աղբյուր` Փաստինֆո