Փաստ ինֆո

Քնի պակասը սպառնում է վտանգավոր հիվանդությունների զարգացմանը, նախազգուշացրել է բժիշկ-սրտաբան Նատալյա Զոլոտարևան: Քնի պակասի նենգ հետևանքների մասին նա պատմել է Life-ի հետ զրույցում։

Զոլոտարեւայի խոսքով՝ քնի դանդաղ փուլերն ապահովում են օրգանիզմի ֆիզիկական ռեսուրսների վերականգնում, հորմոնների արտազատում, մկանների թուլացում, սրտի ռիթմի դանդաղեցում եւ արյան ճնշման իջեցում: Բացի այդ, այդ ժամանակ ուղեղը մշակում է օրվա ընթացքում ստացված տեղեկատվությունը և ձևավորում երկարաժամկետ հիշողություն:

Քնի պակասի դեպքում խախտվում են նյութափոխանակությունը եւ էնդոկրին ֆունկցիաները, ինչը հանգեցնում է զարկերակային ճնշման բարձրացման եւ ցիտոկինների մակարդակի բարձրացման, որոնք նպաստում են բորբոքմանը, պատմել է բժիշկը: Սրտաբանը հավելել է, որ քնի պակասը մեծացնում է աթերոսկլերոզի եւ սրտի իշեմիկ հիվանդության զարգացման ռիսկը, ինչպես նաեւ գրելին եւ լեպտին հորմոնների արտադրության խանգարումները, որոնք հանգեցնում են գլյուկոզայի նյութափոխանակության հետ կապված խնդիրների եւ մեծացնում է մետաբոլիկ համախտանիշի վտանգը:

Քնի որակը բարելավելու և սրտանոթային հիվանդությունների ռիսկը նվազեցնելու համար սրտաբանն առաջարկել է քնելուց առաջ խուսափել ալկոհոլից և կոֆեինից, սահմանափակել ծխելը, վերջին սնունդն ընդունել քնելուց 2-2,5 ժամ առաջ,հրաժարվել նորություններ դիտելուց և սահմանափակել գաջեթների օգտագործումը քնելուց երկու ժամ առաջ: Զոլոտարևան նաև խորհուրդ է տվել զովություն պահպանել սենյակում, օդի խոնավացուցիչ օգտագործել աշնանը և ձմռանը, իսկ քնի քրոնիկ խնդիրների առկայության դեպքում պարբերաբար հետազոտություն անցնել սրտաբանի մոտ:

Աղբյուր` Փաստինֆո