Փաստ ինֆո

Արդարադատության նախարարի այն թեկնածուները, որոնք ներկայացվում են՝ նրանց 80 տոկոսը ասում են, որ գոհ են այն պաշտոնից, որ այդ պահին զբաղեցնում են ու ուզում են շարունակել աշխատել նույն տեղում։ Այս մասին այսօր ԱԺ-ում ճեպազրույցների ժամանակ ասաց ԱԺ նախագահ Ալեն Սիմոնյանն՝ անդրադառնալով նախօրեին կայացած ՔՊ վարչության նիստում թեկնածուներից որևէ մեկի չընտրվելուն։

«Ստացվում է, որ մարդուն նշանակում ես, մի ամիս կամ մի տարի աշխատում է, հետո իրեն էդտեղից պոկում՝ տանում ես ուրիշ տեղ։ Երևի մի փոքր սխալ բան ենք արել, մենք քննարկում ենք բոլոր թեկնածուներին՝ անկախ նրանից այդ թեկնածուն իր համաձայնությունը տվել է, թե ոչ»։

Դիտարկմանը՝ թե ստացվում է՝ թեկնածուները չեն ցանկանում՝ նա պատասխանեց, որ այո, չեն ցանկանում, որովհետև իրենք շատ լուրջ մասնագետներ են իրենց ոլորտներում։ «Բայց ես վստահ եմ, որ մոտ ապագայում նոր թեկնածու կունենանք»։
Հարցին, թե արդյոք շարունակելու են պնդել, որ այդ թեկնածուն անպայման պետք է լինի կուսակցական՝ նա պատասխանեց, որ այդ մոտեցումը ևս պետք է վերանայեն։

«Կարծում եմ, պետք է հնարավորություն տանք թեկնածու ներկայացնել անձանց, որոնք ՔՊ-ի անդամներ չեն։ Կարծում եմ մենք նման բազմաթիվ լավ փորձեր ունենք»։

Հարցին, թե ստացվում է ՔՊ-ում մարդկանյին ռեսուրսի խնդիր կա՞՝ նա պատասխանեց, որ մարդկային ռեսուրսների խնդիր կա բազմաթիվ բնագավառներում, հատկապես արդարադատության նման պատասխանատու ոլորտում, որտեղ բազմաթիվ են խնդիրները։

«Հատկապես, եթե հայ–ադրբեջանական խաղաղության պայմանագրի ստորագրման դիտանկունից ենք նայում, ակնհայտ է, որ պետք է մի մասնագետ լինի, որը նաև այդ պայմանագրի հետ առնչություն ունենա։ Վստահ եմ, որ ամենափոքր ձեռնարկությունում անգամ կադրերի խնդիր կարող է լինել»,-ասաց նա։

Աղբյուր` Փաստինֆո