Փաստ ինֆո

Արտասովոր, անթույլատրելի բան է տեղի ունեցել։ Այս մասին հայտարարել է Ալեն Սիմոնյանը՝ անդրադառնալով օրերս Արգիշտի Քյարամյանի և Հովիկ Աղազարյանի մասնակցությամբ միջադեպին։

Հարցին՝ արդյո՞ք խմբակցությունում քննարկել են Արգիշտի Քյարամյանի հարցը, Սիմոնյանն արձագանքեց՝ նշելով, թե սա թագավորություն չէ, որ թագավորն ասի՝ սրան բանտ նետեք, սրա գլուխը կտրեք. այդպես չի լինում։
«Սա պետություն է, կուսակցություն գոյություն ունի։ Հետևանքներ, բնական է, կլինեն»։

Սիմոնյանի խոսքով՝ «ՔՊ»-ում թևեր չկան, կա մի թև՝ Նիկոլ Փաշինյանի թևն է։

«Մեկ անձի կուսակցություն չէ, մեր առաջնորդին սատարող խմբակցության պատկեր է, դրա մեջ որևէ տարօրինակ բան չկա։ Եթե այդպես չլիներ, մենք կունենայինք վարչապետի այլ թեկնածու»,- ընդգծեց Ալեն Սիմոնյանը:

Դիտարկմանը, որ տպավորություն, որ իշխանությունը խնայում է Արգիշտի Քյարամյանին, ի տարբերություն Գրիգոր Մինասյանի, արդյոք մտավախությունն այն չէ, որ Քյարամյանը կարող է ավելի շատ ինֆորմացիայով բացվել, Սիմոնյանը պատասխանեց՝ նշելով․ «Ես չեմ կարծում՝ մեր թիմն այնպես է աշխատել, որ նման մտավախություն լինի: Օրինակ, Ալեն Սիմոնյանի հետ կապված ինչ-որ բան եղավ եւ ոչ պարոն Քյարամյանը, ոչ մնացած իրավապահները, ոչ դատարանը չհապաղեց որևէ գործողություն անելուց: Դա խոսում է այն մասին, որ նման մտավախություն չկա:

Ըստ Սիմոնյանի՝ եթե ինքը դահլիճում լիներ այդ ժամանակ, նման իրավիճակ տեղի չէր ունենա։
«Ընդդիմությունը վերջին ընտրությունների ժամանակ եկավ էստեղ փրթենք-թափենք, գնդակահարենք տրմաբանությամբ, բայց կարողացանք հետները համագործակցել: Ճիշտ է, ես էլ եմ հաճախ ունենում էմոցիոնալ պոռթկումներ, բայց կարծում եմ, որ որպես ԱԺ նախագահ վատ չեմ իրականացնում իմ աշխատանքը»,- ասաց նա։

Աղբյուր` Փաստինֆո