Փաստ ինֆո

Գեղարքունիքի սահմանամերձ գյուղերում մեծ արտագաղթ կա։ Այս մասին «Փաստինֆո»-ին ասաց ՀՀ ԱԺ «Հայաստան» խմբակցության պատգամավոր Արման Ղազարյանն, որը Գեղարքունիքի մարզից է։

Այն, որ ցույց են տալիս, թեամեն ինչ նորմալ է, այդպես չէ, ոչ մի նորմալ բան էլ չկա, Վարդենիսի սահմանամերձ հատվածի բնակիչների մի մասն աշխատում էր Սոթքի հանքում, ավելի քան 700- մարդ կորցրեց այդ աշխատանքը, մի մասն այս պահին Երևանի շինարարությունների մեջ է աշխատում կամ արտագաղթում է։Դատարկվել են այդ գյուղերը»,- ասաց պատգամավորը։

Նշելով, որ ինքը Մարտունու Զոլաքար գյուղից է՝ Ա.Ղազարյանը նկատեց, որ անցյալ տարվա 1370 ծխացող տնտեսությունից 400 տան դռները փակ են, մարդիկ արտագաղթել են։

«Ես պաշտոնական թվեր եմ ասում։ Դա ինչպե՞ս են հաշվել, մարդը, որ դուռը փակում է, գազ, էլեկտրաէներգիա ամիսներով չի օգտագործում, հստակ հասկանալի է, որ գնացել է ընտանիքով»,- ընդգծեց ընդդիմադիր պատգամավորը։
Բացի այդ՝ կան ֆերմերներ, որոնք դեռ ունեն ցանքատարածքներ, բայց մարզում աշխատուժ չեն գտնում՝ ահագնացած արտագաղթի պատճառով, ու ստիպված ուրիշ վայրերից են աշխատողներ բերում։

«Ես հաճախ եմ խոսում ֆերմերների հետ, ասում են, որ խնդիր կա նաեւ վաճառքի հետ, ստացված մշակաբույսերի գինը շուկայում շատ ցածր է, սպառում չկա։ Շատ մեծ քանակությամբ արդեն չեն ցանում, մոտ 30-ից 35 տոկոսով կրճատվել է նախորդ տարիների համեմատ»,- ասաց Ա. Ղազարյանն ու ավելացրեց, որ Վարդենիսի տարածաշրջանում ունեն լավ բերրի հողեր, որոնք նախկինում մշակվում էին, իսկ այսօր՝ ոչ, քանի որ գտնվում են ուղիղ նշանառության տակ, համարվում է ռիսկային գոտի։

Նախկինում գյուղացիներն արտադրանքն իրացնում էին նաեւ փոխանակման միջոցով։ Ընդ որում, նման գործարքներն առավելապես իրականացվում էին արցախցիների հետ։ Ըստ պատգամավորի՝ Արցախից ցորեն, նուռ, արքայախնձոր էին բերում ու փոխանակում կաղամբի, բազուկի, կարտոֆիլի, գազարի, խնձորի, տանձի հետ։

«Կոնկրետ մեր գյուղի թվերը հիշում եմ՝ միայն մեր գյուղից մոտ 1000 տոննա ապրանք էր Արցախում իրացվում էր։ Իսկ հիմա արդեն ցորենի խնդիրը շատ սուր է, Վարդենիսում ցորեն չկա, Արցախը չկա, ես չգիտեմ այս մարդիկ պարենային անվտանգության խնդիրն ի՞նչպես են լուծելու»,- արձանագրեց պատգամավորը՝ նշելով, որ, ընդհանրապես, ցորենի մոտ 30 տոկոսը նախկինում Արցախից էր գալիս։

Հիմա ոչ միայն այդ ցորենը չի գալիս, այլ նաեւ Վարդենիսում կրճատվել են ցորենի դաշտերը։ «Գեղամասարի հատվածներում, Կութի հատվածներում մեծ ցանքատարածքներ կան, բայց հիմա նշանառության տակ են ու ոչ ոք չի գնում, չի ցանում։ Գյուղտեխնիկա այդ հատվածում չի կարող աշխատել։ Անասնապահության հարցով էլ ասեմ՝ գլխաքանակը 4, 5 անգամ կրճատվել է, այսպես, որ գնա, վաղն անասնապահություն էլ չի լինելու։Արոտավայրերը մնացել է Ադրբեջանի գրաված հատվածներում։ Համայնքներ կան, որտեղ անգամ ջրի ակունքներն են անցել Ադրբեջանի վերահսկողության տակ։ Սուբվենցիոն ծրագրով նոր ջրագիծ էր կառուցվել, բայց Ադրբեջանի վերահսկողության տակ է անցել եւ ջրագիծը չի կարող գործել, խոսքը խմելու ջրի մասին է» , - ավելացրեց Արման Ղազարյանը։

Աղբյուր` Փաստինֆո