Փաստ ինֆո

Գյումրիի քաղաքապետ Վարդգես Սամսոնյանը հրաժարական չի տվել, չի պատրաստվում հրաժարական տալ, «Բալասանյան» դաշինքի անդամներն էլ չեն պատրաստվում վայր դնել մանդատները։ Այս մասին «Փաստինֆոն»-ին ասաց Գյումրիի քաղաքապետի մամլո խոսնակ Սոնա Առաքելյանը։

Նշենք, որ հրաժարականի լուրերը առավել ակտիվ սկսել են շրջանառվել Սամվել Բալասանյանի նկատմամբ հարուցված քրեական հետապնդման մասին հայտնի դառնալուց հետո։

Լուրերի վերաբերյալ մեկնաբանություն ստանալու համար «Փաստինֆո»-ն փորձեց կապ հաստատել քաղաքապետի մամլո խոսնակի հետ, որը չպատասախանեց զանգերին, սակայն գրավոր հղված հարցին արձագանքեց կարճ հաղորդագրությամբ՝ առ այն, որ նման բան չկա, այդ լուրերն ինքը չի հաստատում։

Ավելի վաղ հաղորդել էինք, որ Գյումրիի նախկին քաղաքապետ Սամվել Բալասանյանի նկատմամբ հարուցված է հանրային քրեական հետապնդում։ Ոստիկանությանը հանձնարարություն է տրվել Գյումրիի նախկին քաղաքապետ Սամվել Բալասանյանին վարույթն իրականացնող մարմնին ներկայացնելու վերաբերյալ։ Այս մասին «Փաստինֆո»-ի հետ զրույցում հայտնել էին ՀՀ Քննչական կոմիտեից։

Նախաքննական մարմնի վարկածով` Սամվել Բալասանյանը և նրան փոխկապակցված անձինք օրենքի խախտմամբ սեփականաշնորհել են «Սև բերդ» պատմամշակութային ամրոցի հարակից հողերը: ՔԿ-ում քննվող կոռուպցիոն գործի շրջանակներում Երևանի «Զվարթնոց» օդանավակայանում ձերբակալվել է Գյումրիի նախկին քաղաքապետ Սամվել Բալասանյանի կրտսեր որդին՝ Խաչատուր Բալասանյանը։ Նրան մեղադրանք է ներկայացվել, դատարանը մերժել է նրա նկատմամբ կալանավորումը որպես խափանման միջոց ընտրելու մասին քննիչի միջնորդությունը՝ կիրառելով համակցված խափանման միջոց` գրավ և տնային կալանք։ Գործով ձերբակալվածների թվում են եղել նաև Գյումրիի ներկայիս քաղաքապետի տեղակալ Սուրեն Ջանոյանը և Սամվել Բալասանյանի պաշտոնավարման ժամանակ փողքաղաքապետի պաշտոնը զբաղեցրած Ռուբեն Սանոսյանը։ Քրեական վարույթի շրջանակներում այս պահին հինգ մեղադրյալ կա։

Օրերս էլ որոշում է կայացվել Բալասանյանին ձերբակալելու մասին։ Սամվել Բալասանյանի նկատմամբ հետապնդում է իրականացվում պաշտոնեական լիազորությունները չարաշահելու և խոշոր չափի փողերի լվացման հատկանիշներով։«Փաստինֆո»-ի տեղեկություններով՝ վերջինս արտերկրում է։

Աղբյուր` Փաստինֆո