Փաստ ինֆո

Հակակոռուպցիոն դատարանում՝ դատավոր Գիվի Հովհաննիսյանի նախագահությամբ, այսօր կայացել է ՊԵԿ նախկին նախագահ Գագիկ Խաչատրյանի և Կարեն Խաչատրյանի գործով դատական նիստը։ Այսօրվա նիստին ևս Գագիկ Խաչատրյանը չի ներկայացել՝ առողջական խնդիրների պատճատով։

Նշենք, որ Խաչատրյանների վերաբերյալ գործը 4,5 տարի քննվելուց հետո վերսկսվել է, քանի որ նախագահող Արթուր Մկրտչյանը թոշակի է անցել։ Գործը վերամակագրվել էր Երևանի ընդհանուր իրավասության քրեական դատարանի դատավոր Տաթևիկ Մուրադյանին, որի որոշմամբ քրեական գործն, ըստ ընդդատության, տեղափոխվել է Հակակոռուպցիոն դատարան, այժմ գտնվում է դատավոր Գիվի Հովհաննիսյանի վարույթում։

Գագիկ Խաչատրյանի պաշտպան Երեմ Սարգսյանը միջնորդություն է ներկայացրել՝ պահանջելով թույլ տալ Գագիկ Խաչատրյանին՝ մեկնել ՀՀ-ից՝ վիրահատության նպատակով։ Պաշտպանը պնդում է, որ այլևս խնդիրը ոչ թե հաշմանդամությունը վերացնելը, այլ՝ կյանքը փրկելն է։

Հանրային մեղադրող Գևորգ Սարգսյանն էլ պահանջում է՝ Գագիկ Խաչատրյանի նկատմամբ հանձնաժողովային փորձաքննություն նշանակել ՝ պնդելով ՝ պաշտպանության կողմը ձգձգում է գործի քննությունը, պաշտպանության կողմը, սակայն, առարկել է միջնորդության դեմ՝ հիմնավորելով, որ նախկիրնում արդեն իսկ եղել են դատաբժշկական փորձաքննություններ, հանրային մեղադրողի մոտ բնավորություն է դարձել՝ ամեն անգամ Գագիկ Խաչատրյանի՝ արտերկրում վիրահատության թույլտվության միջնորդության քննարկման ընթացքում պահանջել դատաբժշկական փորձաքննություն։

«Մեղադրողի կողմից ներկայացված միջնորդությունն անհիմն է, Գագիկ Խաչատրյանին ՀՀ-ից դուրս գալու թույլտվության և վիրահատության ձգձգման միտում ունի։ Իսկ այս պրոցեսը հասցնում է անձին մահվան, այսինքն այս պրոցեսն աստիիճանաբար բերելու է այն վիճակին, որ կարող է անդառնալի լինել նույնիսկ կյանքի առումով։ Մինչև հիմա առողջության մասին էինք խոսում, հիմա արդեն կյանքի մասին»,- ասաց Ե. Սարգսյանը։

Հիշեցնենք, որ Գագիկ Խաչատրյանը և Կարեն Խաչատրյանը մեղադրվում են պետական գործունեության ընթացքում թույլ տված ենթադրյալ պաշտոնեական դիրքի չարաշահման, գույքի վատնման և պաշտոնեական կեղծիքի համար։ Ըստ մեղադրանքի՝ ՊԵԿ նախկին նախագահ Գագիկ Խաչատրյանը, իր ազգականներին նյութական օգուտ տալու անձնական շահագրգռվածությունից ելնելով, պաշտոնեական դիրքը ծառայության շահերին հակառակ օգտագործելով, իրենից ծառայողական կախվածության մեջ գտնվող տեղակալի՝ Տիգրան Տարիելի Բարսեղյանի, ինչպես նաև պաշտոնատար և այլ անձանց մասնակցությամբ, ՀՀ օրենսդրության և ՀՀ կառավարությանն առընթեր ՊԵԿ կողմից կնքված պայմանագրի դրույթների խախտմամբ, ապահովել է ՀՀ պետական բյուջեի հանդեպ 79.372.897.900 ՀՀ դրամ պարտավորությունների դիմաց «Հայգազարդ» ՓԲ ընկերության կողմից ՀՀ պետական եկամուտների կոմիտեում 2011թ. ապրիլի 18-ի պայմանագրով գրավադրված «Հիդրոապարատ» ԲԲ ընկերության 132.615 հատ բաժնետոմսերի շուկայականից էապես ցածր գնով՝ 34.328.964 ՀՀ դրամով իրացումը քրոջ և եղբոր որդիների՝ Ռուբիկ Գասպարյանի և Արամ Խաչատրյանի մասնակցությամբ հիմնադրված «Մոնդո Դի Մոբիլի» ՍՊ ընկերությանը, իսկ ներդրում կատարելու վերաբերյալ մրցույթի անցկացման պարտադիր պայմանը նշված ընկերության հետ կնքված 2012թ. հուլիսի 2-ի բաժնետոմսերի առուվաճառքի պայմանագրում չներառելու հետևանքով ապահովել է «Մոնդո Դի Մոբիլի» ՍՊ ընկերության ազատումը 5.000.000 եվրոյին համարժեք 2.624.000.000 ՀՀ դրամ ներդրում կատարելու պարտավորությունից: Նշված գործողությունների հետևանքով խախտվել է պետական մարմինների բնականոն գործունեությունը, խաթարվել է պետական բյուջեի նկատմամբ առկա պարտավորությունների դիմաց գրավադրված գույքի իրացման գործընթացը, անհավասար պայմաններ են ստեղծվել իրացման գործընթացի հնարավոր այլ մասնակիցների համար, որի արդյունքում պետությանը պատճառվել է 34.328.964 ՀՀ դրամի, իսկ կազմակերպությանը՝ 2.624.000.000 ՀՀ դրամի նյութական վնաս, որն առաջացրել է ծանր հետևանքներ:

Նույն գործով մեղադրյալի կարգավիճակում է նաև նրա եղբորորդին՝ Կարեն Խաչատրյանը։ Գագիկ և Կարեն Խաչատրյանները մեղադրանքը չեն ընդունում։

Հեղինակ՝ Իզաբել Սահակյան

Աղբյուր` Փաստինֆո