Փաստ ինֆո

Փաստաբանները դատական կարգով փորձում են շրջանառությունից հանել Սմբատ Հովհաննիսյանի կողմից հեղինակած 7-րդ դասարանի «Հայոց պատմության» դասագիրքը, որը մասնագետների գնահատմամբ աղավաղում է հայոց պատմությունը։

Ինչպես արդեն հայտնել ենք՝ ՀՀ կրթության, գիտության, մշակույթի և սպորտի նախարարը 2023թ. ի սկզբանե 7-րդ դասարանի Հայ Ժողովրդի պատմության երկու դասագիրք էր երաշխավորել գործածության: Մեկը Աշոտ Ղուկասյանի և Ա․Տերյանի հեղինակած «Հայոց պատմություն» դասագիրքն էր, իսկ մյուսը՝ մեծ սկանդալ առաջացրած Ս.Հովհաննիսյանի հեղինակած «Հայոց պատմություն» դասագիրքը, սակայն հետագայում նախարարը առաջին դասագիրքը ուղարկել էր երկրորդ անգամ փորձաքննության ու հանել շրջանառությունից, իսկ մասնագետների կողմից խոտանված՝ Ս.Հովհաննիսյանի հեղինակած դասագիրքն ուղարկել դպրոց։

Փաստաբան Արա Զոհրաբյանն այսօր տեղեկացրեց, որ նախարարի երկու որոշումներն էլ բողոքարկվել են եւ երկու հայցադիմում ներկայացվել դատարան։
Հայցերից մեկով պահանջել են անօրինական ճանաչել Սմբատ Հովհաննիսյանի հեղինակած 7-րդ դասարանի «Հայոց պատմության» դասագիրքը հաստատելու մասին ԿԳՄՍ նախարարության որոշումը։ Ա.Զոհրաբյանի փոխանցմամբ՝ այս հայցը նախ չի ընդունվել վարույթ, ինչը բողոքարկել են, հասել մինչեւ վճռաբեկ դատարան, որն էլ այն ուղարկել է առաջին ատյան՝ քննության։ Իսկ երկրորդ հայցը ՀՀ Վարչական դատարանը բավարարել է ու ճանաչել Ղուկասյանի դասագիրքը գործածությունից դուրս թողած նախարարի հրամանի ընդունման արդյունքում ծագած իրավահարաբերության բացակայությունը:

«Հաղթանակ ենք արձանագրել», - ասաց փաստաբանը՝ նշելով, որ վճռի օրինական ուժի մեջ մտնելու պահից դպրոցները և ուսուցիչները կունենան 7-րդ դասարանի «Հայոց պատմություն» դասագրքի այլընտրանքային տարբերակ։

Հաղթանակից բացի, նաեւ հետաքրքիր դրվագներ են ի հայտ եկել դատական գործընթացում։ Մասնավորապես՝ պարզվում է մասնագիտական հանրության կողմից Սմբատ Հովհաննսիսյանի դասագրքում առկա խնդիրների մասին բարձրաձայնումից հետո, ԿԳՄՍ նախարարությունը ստալինյան ժամանակների մեթոդ է կիրառել։ Այն է՝ ինչ-որ զանգերի, անանուն նամակների հիման վրա Աշոտ Ղուկասյանի դասագիրքը կրկնակի փորձաքննության է ուղարկվել ։

Լրագրողների հարցին, թե ինչպես է դա կազմակերպվել՝ Զոհրաբյանը, վկայակոչելով դատարանից ստացած տեղեկությունները, նշեց, որ մի կին է ինչ-որ գյուղից զանգել ու ասել, որ գիրքը չի համապատասխանում գիտական չափորոշիչների, սակայն պատասխանող կողմն անգամ դատարանում չի կարողացել ասել, թե ի՞նչ չափորոշիչների չի համապատասխանել, փոխարենը փորձել է վստահեցնել, թե այդ կինն է իմացել, բացի այդ՝ եղել են մի քանի անանուն նամակներ։

Աղբյուր` Փաստինֆո