Փաստ ինֆո

2024 թվականի դեկտեմբերին կավարտվի բռնի տեղահանված արցախցիների համար նախատեսված «40+10» ծրագիրը, թեեւ նոր ծրագիրը դեռ չի որոշվել։

ՀՀ աշխատանքի և սոցիալական հարցերի նախարարության մամլո խոսնակ Զառա Մանուչարյանի փոխանցմամբ՝ մշակվում է նոր ծրագիր, որի մանրամասներն առայժմ չեն հաղորդում։

Նախարարության կայքում հրապարակված իրազեկող տեսանյութի համաձայն՝ աջակցության համար ընտրվելու են խոցելի խմբերը։ «Փաստինֆո»-ն փորձեց պարզել, թե նախարարությունը ինչպես է ընտրելու տուն ու հայրենիք կորցրած անձանց խոցելի խմբի շրջանակը, ինչին ի պատասխան նա նշեց, որ ծրագրի մանրամասները դեռևս քննարկման փուլում են, առաջիկա շաբաթների ընթացքում նախագիծը կհրապարակվի idraft.am կայքում, ինչը հնարավորություն կտա սկսելու հանրային քննարկում։

Զ. Մանուչարյանի փոխանցմամբ՝ նոր ծրագրի նախագիծը պատրաստ լինելու դեպքում կապահովվի դրա քննարկմանը հանրության մասնակցությունը, որ ներկայացնեն իրենց առաջարկներն ու դիտարկումները, որից հետո միայն ծրագիրը կներկայացվի կառավարության հավանությանը։

Ասել է թե՝ առանց անգամ նոր ծրագրի նախագծի մշակման՝ կառավարությունը որոշել է դադարեցնել գործող ծրագիրը, ընդ որում՝ ձմռանը, երբ ավելանում են նաեւ ջեռուցման ծախսերը։

Զառա Մանուչարյանն ասաց, որ եթե «40+10» ծրագրով աջակցությունը տրամադրվում է բոլորին, ապա նոր ծրագիրը շահառուների կոնկրետ խմբեր է ունենալու՝ հստակ նպատակով։

Նկատենք, որ այսօր «40+10» ծրագիրը էական դեր ունի բռնի տեղահանվածների կարիքները հոգալու հարցում, քանի որ նրանցից շատերը տուն չունեն։ Ինչպես «Փաստինֆո»-ի հետ զրույցում նշեց բռնի տեղահանված Նարե Սիմոնյանը՝ տուն չունեն և այդ աջակցությունը ուղղում են բնակության վայրի վարձավճարին։ Երեւանում բնակարանների վարձավճարները բարձր են, իսկ մարզերում էլ աշխատանք չկա։ Ընդ որում՝ աշխատավարձերն էլ առանձնապես բարձր չեն, որ հնարավոր լինի դրանով եւ վարձերը վճարել եւ ասվա կտրվածքով կեցության մյուս ծախսերը հոգալ։

Աղբյուր` Փաստինֆո