Փաստ ինֆո

Պատմության մասնագետների խմբի հեղինակած և ԿԳՄՍ նախարարության կողմից չհաստատված գիրքն այլևս կարող է համարվել այլընտրանքային, սակայն մասնագետները մտավախություն ունեն, որ դպրոցներում կշարունակվի դասավանդել որպես խոտան որակված՝ Սմբատ Հովհաննիսյանի հեղինական դասագիրքը։

«Հանրակարթական դպրոցների տնօրեններն ունեն հոգեբանական կաշկանդվածություն ու գիտեն, թե ԿԳՄՍ-ի համար Հայոց պատմության սիրելի գիրքը որն է, անկախ այն հանգամանքից, որ Սմբատ Հովհաննիսյանի հեղինակած՝ 7-րդ դասարանի «Հայոց պատմության» դասագիրքը դպրոց է մտել սկանդալով, մասնագետների քննադատությունները՝ շալակած», - «Փաստինֆո»-ի հետ զրույցում ասաց պատմության ուսուցիչ Արթուր Մկրտչյանը։

Նա ուրախ է, որ պատմության մասնագետների խմբի հեղինակած և ԿԳՄՍ նախարարության կողմից չհաստատված գիրքն այլևս կարող է համարվել այլընտրանքային, քանի որ հաղթել է ԿԳՄՍն- ի որոշման դեմ դատավարությունը, սակայն ուսուցչի կանխատեսումը լավատեսական չէ։

«Լավ է, որ հաղթեցին դատը, բայց մեծ հույսեր, որ այդ դասագիրքը կմտնի դպրոց, ինքս չունեմ։Միշտ էլ եղել են «Հայոց պատմության» և այլ առարկաների այլընտրանքային գրքեր, նախկինում էլ դպրոցներին ներկայացվել երկու աշխատանքային խմբի՝ է «Հայոց պատմության» դասագրքերը եւ դպրոցներն իրենց հայեցողությամբ ընտրել են։ Բայց այդ ժամանակ երկու դասագիրքն էլ ընդունված էր ԿԳՄՍ նախարարության կողմից, հիմա դատ է եղել, ԿԳՄՍՆ-ի որոշումը դատական ակտով է փոխվել, հարցը դա է»,- ասել է ուսուցիչն արձանագրելով, որ դպրոց դասագիրք մտցնելը հեշտ չէ։

«Դժվար է պատկերացնել, որ գիրքը թեկուզ որպես այլընտրանքային, դպրոց մտնի տարվա կեսից։ Դպրոցներն իրենց գլխի ճարն արդեն տեսել են, պատվիրել են Սմբատ Հովհաննիսյանի այդ սկանդալային գրքերը ու արդեն ձեռնտու էլ չէ նորից փոխել։ Հաջորդ տարի էլի հնարավոր է, բայց այստեղ էլ խնդիր կա։ Եթե հաշվի առնենք մեր տնօրենների կաշկանդվածությունը, վախկոտությունը, ինձ թվում է, որ քչերը կընտրեն այդ գիրքը։ Ցուցում նախարարությունից չի լինի, նախարարությունը ոչ ցանկալի տոնով կասի՝ «տալիս եմ, բայց վերցնո՞ ւմ ես»։ Սա է իրավիճակը», - ասաց ուսուցիչն ու շարունակեց, - «Առաջ նոր գրքերին ծանոթանալու նպատակով օգոստոս ամսին ուսուցիչները դպրոց էին մտնում, նման հնարավորություն կար։Նախ շուտ էինք ստանում գրքերը, կարողանում էինք ծանոթանալ, երկրորդ՝ գոնե օնլայն հարթակում լինում էր, հիմա դա էլ չեն հասցնում դնել։ Տարին սկսվում է, մտածում են՝ տպե՞ն նոր գրքեր, թե՞ ոչ»։

Նրա փոխանցմամբ՝ դասագրքին նախապես ծանոթ լինելը ինքնանպատակ չէ, որքան էլ ուսուցիչը կառչած չլինի գրքից, այն ուսումնասիրում է՝ տեղեկանալու, թե գրքով ի՞նչ թեմաներ են նախատեսված եւ ինչ հերթականությամբ, որպեսզի իր տարեկան պլանը կազմի, աշակերտին տրվող հանձնարարականները մտածի, տնային աշխատանքների առաջադրանքների ցանկ կազմի։Դասագիրքը ուշացումով դպրոց բերելով ուսուցչի գործն ավելի են դժվարացնում, - ասաց Մկրտչյանը։

Ինչպես հայտնի է՝ ՀՀ կրթության, գիտության, մշակույթի և սպորտի նախարարն ի սկզբանե 7-րդ դասարանի Հայ Ժողովրդի պատմության երկու դասագիրք էր երաշխավորել գործածության: Մեկը Աշոտ Ղուկասյանի և Ա․Տերյանի հեղինակած «Հայոց պատմություն» դասագիրքն էր, իսկ մյուսը՝ մեծ սկանդալ առաջացրած «Մասնակցային դպրոց» ԿՀ միջգիտակարգային նախագծի շրջանակում Ս.Հովհաննիսյանի հեղինակած «Հայոց պատմություն» դասագիրքը, սակայն հետագայում նախարարը առաջին դասագիրքը հանել էր շրջանառությունից՝ թողնելով միայն խոտանվածը։ Նախարարի այս որոշման դեմ դատական հայց էր ներկայացվել, որի արդյունքների մասին տեղեկացրել է փաստաբան Արա Զոհրաբյանը։

«Կարին Տոնոյանի ղեկավարած Հայ Ասպետ դպրոցի և ուսուցչի միջոցով, փաստաբաններ Սիմոն Բաբայանի և Մանե Կարապետյանի հետ միասին հայց ենք ներկայացրել ՀՀ վարչական դատարան:

ՀՀ Վարչական դատարանը՝ դատավոր Լիլիթ Սադոյանի նախագահությամբ, քննել է նշված գործը և այսօր՝ 2024թ. հոկտեմբերի 15-ին, մեր հայցը բավարարել է:

Դատարանը վճռել է ճանաչել Ղուկասյանի դասագիրքը գործածությունից դուրս թողած նախարարի հրամանի ընդունման արդյունքում ծագած իրավահարաբերության բացակայությունը:

Դատարանի վճռի օրինական ուժի մեջ մտնելու պահից դպրոցները և ուսուցիչները կունենան 7-րդ դասարանի Հայոց պատմություն դասագրքի այլընտրանքային տարբերակ»,- հայտնել էր Արա Զոհրաբյանը:

Աղբյուր` Փաստինֆո