Փաստ ինֆո

ԱԺ-ում իրավիճակը լարվեց՝ Հովիկ Աղազարյանի ելույթի ժամանակ, երբ վերջինս մեկնաբանեց Արգիշտի Քյարամյանի ելույթը։ Արգիշտի Քյարամյանն էլ արձագանքեց՝ նշելով․ «Պարոն Աղազարյան, ինչպես կհրամայեք խոսել պարոն Քոչարյանի հետ։ Ինչում է դժգոհությունը։ Երկրորդը՝ ռեպլիկի հետ կապված՝ այս երկրի երեսին այնպիսի մեկը չկա, որ կարողանա իմ ասածների վերաբերյալ ռեպլիկ բաց թողնել․ եթե եղել է էդպիսին, ուրեմն արձագանքը հետագայում կզգացվի, ես դեռ շատ մեղմ արձագանք եմ բաց թողել»։

Անդրանիկ Քոչարյանը փորձեց ընդհատել Քյարամյանին՝ նշելով, թե տղայական խոսակցություններ են, սա ԱԺ է։ Քյարամյանն էլ հակադարձեց․ «Դուք չորակեք նման բան։ Տղայականը ազդարարման համակարգին գործ տալ ասելն է։ Խնդրում եմ նաև մեկնաբանել, թե ինչով է պայմանավորված, որ առնվազն երկու անգամ ինձ դիմել են պարոն Աղազարյանի որդիների հետ կապված՝ քրեական գործերով մեքենաները վերադարձնելու հետ կապված։ Բա եթե խոսում ենք կոռուպցիայի դեմ պայքարից, հովանավորչությունից, ապա պատասխանեք այդ հարցին»։ Հովիկ Աղազարյանն էլ նշեց՝ ինքը չի ասում, թե ինչու իր որդու վերաբերյալ գործը հասցնում մինչև վերջ, գուցե պահում է, որ նվիրի՝ պարոն Լևոն Քոչարյանին։

«Ես իմ տղային հրահանգել եմ, որ ոչ մի կոմպրոմիսի չգնա, գործը գնա դատարան։ Հետևաբար, պարոն Քյարամյան, Դուք ապացուցում եք իմ մտահոգությունը, որ դուք ճնշման գործիք եք օգտագործում։ Ինչ է նշանակում՝ չկա մեկը, որ ինձ դիտողություն անի, Ձեր թաղը չի ստեղ, արա»,- ասաց Հովիկ Աղազարյանը, ապա՝ շրխկացնելով թեքեց միկրոֆոնը։ Քյարամյանն էլ արձագանքեց՝ «ոտքից գլուխ ես արա»։ Աղազարյանն էլ պահանջեց ասել՝ ովքեր են դիմել Քյարամյանին որդու համար։

Տարածված տեսանյութերից երևում է, որ վեճը բաժանելու համար Հակակոռուպցիոն կոմիտեի նախագահ Սասուն Խաչատրյանը, պատգամավոր Վլադիմիր Վարդանյանը Քյարամյանին հեռացրել են, Խաչատրյանը՝ նստել է Հովիկ Աղազարյանի կողքին՝ Քյարամյանի տեղում, իսկ ԱԱԾ տնօրեն Արմեն Աբազյանն էլ փորձում էր հանդարտեցնել Քյարամյանին՝ բռնելով ձեռքը։

Աղբյուր` Փաստինֆո