Փաստ ինֆո

44-օրյա պատերազմի հետ կապված քրեական վարույթների շրջանակներում շուրջ 600 անձի մասով մեղադրական եզրակացությամբ գործեր ենք ուղարկել դատարան։ Այս մասին խորհրդարանական լսումների ժամանակ հայտարարեց ՔԿ նախագահ Արգիշտի Քյարամյանը։

Նա նշեց, որ ի սկզբանե որոշել էին տարանջատել սպայական կազմի և շարքային կազմի վերաբերյալ վարույթները, սպայական կազմի վերաբերյալ գործերը ԶՔԳՎ ՀԿԳ վարչությունում են քննվում, հիմնականում յոթ ուղղությամբ է քննություն իրականացվում։ Անհետ կորածների դեպքերով քննությունը ևս իրենց ուշադրության կենտրոնում է՝ ըստ Քյարամյանի։

Այսօրվա նիստում բարձրացվել է նաև ոչ մարտական զոհերի դեպքերի աճի խնդիրը։ Մասնավորապես, ԱԺ պատգամավոր Աննա Գրիգորյանը հայտնել է, որ դատախազություն հարցում է կատարել, ի պատասխան նշվել է, որ 2020-24 թթ. ունենք 108 քրեական գործ, որոնցից միայն 7-ի հետ կապված կա մեղադրական դատավճիռ։ Այս առնչությամբ գլխավոր դատախազը հայտնել է, որ 2023 թ. ՀՀ ԶՈւ-ում եղել է հանցագործության 2 358 դեպք, մինչդեռ 2022 թ. 4 570-ն է եղել, այսինքն` 48.4 տոկոսով նվազում է արձանագրվել, 2023 թ. խաղաղ պայմաններում զոհվել է 22 զինծառայող, որից 15-ը՝ Ազատի հրդեհի դեպքի հետևանքով։ 2024 հունվարից մինչ օրս զինծառայողների մահերի թիվը 26-ն է եղել, որից 6-ը սպանություն է եղել, 4-ը` հակառակորդի կողմից սպանություն, 4-ը` ավտովթար, 3 հիվանդության դեպք, դժբախտ պատահարների 1 դեպք և այլն։
ՔԿ նախագահ Արգիշտի Քյարամյանն էլ նշել է, որ ՀՀ ԶՈւ-ում խաղաղ պայմաններում մահվան ելքով դեպքերի բացահայտման գրեթե 100 %-ոց արդյունք ունենք։

Աղբյուր` Փաստինֆո