Փաստ ինֆո

Այսօր արդեն 2 տարի 45 օր է լրանում, ինչ կալանքի տակ է ՊԲ նախկին հրամանատար, գեներալ-լեյտենանտ Միքայել Արզումանյանը։ Ամեն անգամ դանդաղ ընթացող դատաքննության ընթացքում խափանման միջոցի միջնորդությունների քննարկման ընթացքում մեղադրողը հայտարարում է, որ վկաների հարցաքննության ավարտից հետո կարելի է անդրադառնալ խափանման միջոցի փոփոխությանը։ Նախաքննության որակին դեռ չեմ անդրադառնում, մի հատվածով ամբողջությամբ փլվել է մեղադրանքը, մյուսն էլ՝ զավեշտի է վերածվում, երբ շարքային զինվորը վերադասի գործողություններին հարցաքննությամբ կարող է գնահատական տալ։ Այս մասին խորհրդարանական լսումների ժամանակ ասաց ԱԺ «Հայաստան» խմբակցության պատգամավոր Գեղամ Մանուկյանը՝ դիմելով ՀՀ գլխավոր դատախազ Աննա Վարդապետյանին։

«Դեռ 160 վկա կա։ Այս տեմպերով դատաքննությունը 13 տարի շարունակվելու է։ Բարոյական կողմին դեռ չեմ անդրադառնում, որ Արցախի ՊԲ այն հրամանատարը․ որ ամենաճակատագրական պահին համաձայնեց ստանձնել պարտականությունը, բայց որքանով է իրավաբանորեն և բարոյապես նորմալ՝ ՀՀ ԶՈՒ-երում ծառայություն անցած, 16 տարեկանից Արցախյան ազատամարտին մասնակցություն ունեցած, ճակատագրական պահին պատասխանատվություն ստանձնած զինվորական, իմ համոզմամբ՝ քաղաքական նպատակներով, լոկ Նիկոլ Փաշինյանի կամքով 2 տարի 45 օր պահել կալանքի տակ»,- ասաց Գեղամ Մանուկյանը։

Հաջորդիվ պատգամավորը հիշեցրեց Նիկոլ Փաշինյանի ավտաշարասյան մեքենաներից մեկի կողմից վթարի ենթարկվելու հետևանքով մահացած հղի Սոնա Մնացականյանի գործի մասին, ապա՝ նկատեց՝ գործը մի դրվագով հանցակազմի բացակայության հիմքով կարճվել է, քանի որ պահպանված չէ տեսագրությունը։ Աննա Վարդապետյանի պատասխանը կարճ էր։ Մասնավորապես, անդրադառնալով Միքայել Արզումանյանի գործին, նշեց «Մեր դիրքորոշումը արձանագրված է մեղադրական եզրակացության մեջ։ Ձեր դիրքորոշումը քաղաքական են, մենք քաղաքական զսպվածություն ենք ցուցաբերում։ Ձեր գնահատականները փաստաբանական կողմի մեկնաբանություններն են, Ձեր իրավունքն է արձանագրելու։ Մենք մեղադրանք ենք ներկայացրել դատարանում և մեղադրանք ենք պաշտպանում դատարանում։ Ազգային Ժողովի ամբիոնը դատական նիստերի դահլիճ չի, որպեսզի ես որպես մեղադրող հիմա ներկայացնեմ Արեգասարի դրվագը կամ մյուս դրվագները, դատավարությունն էլ հրապարակային է»։ Այս մասով պատգամավորը հակադարձեց՝ գործը դռնփակ է քննվում, որևէ մեկը չի կարող ծանոթանալ։

Ինչ վերաբերում է Սոնա Մնացականյանի գործին, Վարդապետյանը նշեց, որ դատախազությունը փաստերի վրա է հիմնվում, մինչև վերջ գնում է և որոշում կայացնում՝ դատարան գնա գործը, թե՝ ոչ։
Արձագանքի շրջանակներում պատգամավորը նաև հետաքրքրվեց Հովիկ Աղազարյանի վերաբերյալ մամուլի հրապարակումներից, արդյո՞ք դատախազությունը Աղազարյանին անձեռնմխելիությունից զրկելու միջնորդություն կներկայացնի, Վարդապետյանն ի պատասխան փաստացի ոչ հերքեց, ոչ հաստատեց, նշեց՝ դատախազությունը որոշում կկայացնի։

Աղբյուր` Փաստինֆո