Փաստ ինֆո

«Չգիտենք ինչու՝ մենք կարծում ենք, որ դեռ Եվրոպայի մաս ենք. Եվրոպան մեզ լքել է, բայց հետ կգա և մեզ կօգնի։ Այդ սինդրոմը մեր հասարակությունն իր գլխից չի կարողանում հանել։ Ու շարունակ սխալ դիվանագիտություն ենք վարում» , - «Փաստինֆո»-ի հետ զրույցում ասաց քաղաքագետ Արթուր Խաչիկյանը՝ անդրադառնալով Բաքվի պահանջներին։

«Մենք չենք ուզում ընդունել, որ Բյուզանդիան տարածաշրջանից դուրս է եկել մոտ 1000 տարի առաջ։Սխալ մարտավարությամբ հրաժարվել ենք Իրանից ու ՌԴ-ից, տապալել նրանց հետ մեր հարաբերությունները՝ հույսը դնելով գեղեցիկ խոսող սորոսական կապերի, սիմվոլիկ գործողությունների, Մակրոնի դատարկ հայտարարությունների, Փարիզի քաղաքապետի ճառերի, արևմտյան տարբեր գործիչների գեղեցիկ խոսքերի վրա՝ ոչ մի ռեալ բան չստանալով»,- ասել է Խաչիկյանն ու ավելացրել՝ «տեսաք, թե ինչպես է արևմուտքը վերաբերվում Իսրայելին, օգնում է, եթե անգամ Իսրայելը ցեղասպանություն է գործում։Ինչպես են նրանք վերաբերվում Ուկրաինային, այնտեղ անգամ գլոբալ միջուկային պատերազմի առջև են կանգնած և դա էլ չի կանգնեցնում արևմուտքին, որը շարունակում է օգնել։ Մեզ որևէ ձևով երաշխիք չեն տալիս, սա մեր դիվանագիտության տոտալ ձախողումն է»։

Ըստ նրա՝ ինչպես 100 տարի առաջ՝ 1018-1020 թթ-ին, դաշնակցական կառավարությունը սխալվեց իր դիվանգիտության մեջ, հիմա նույն դիվանագիտությունն է վարվում, մեր հասարակությունը չի կարողանում ազատվել այդ լքված եվրոպացու բարդույթից։

«Հոգեբանության մեջ կա լքվածության վախ, երբ երեխան վախենում է, որ իրեն կլքեն։ Եվրոպա այստեղ չկա, այստեղ կա Թուրքիա , Իրան Ռուսաստան։ Դրա փոխարեն մեր ուշքն ու միտքը Փարիզում է, Վաշինգտոնում, Լոնդոնում, բայց խնդիրն այն է, որ այդ երկրներն այստեղ կենսական շահ չունեն։ Իրենց դաշնակիցներն Ադրբեջանն են և Թուրքիան, ու այդ մասին իրենք բաց ասում են։Պրոբլեմն այն է, որ մենք շարունակում ենք լսել քարոզիչների, որոնց ֆինանսավորումը քառապատկվել է եւ 50-60 միլիոն դոլարի փոխարեն արդեն տրամադրում են 500 մլն դոլար։ Դուք պատկերացնո՞ւմ եք, թե այդ գումարով ինչպես կարելի է լվանալ ամբողջ հասարակության ուղեղը։ Դա է մեր խնդիրը՝ ոչ կոմպետենտ կամ ուղղակի արտաքին ուժերի ազդեցության տակ գտնվող կառավարություն և արտաքին ազդեցության գործակալների ցանցը, որը ֆինանսավորվում է արևմուտքի կողմից» , - ասաց Արթուր Խաչիկյանը։

Նրա գնահատմամբ՝ թյուր է այն կարծիքը, թե թույլի դիրքից խոսելով , զիջելով կարելի է բերել խաղաղություն։

«Աշխարհի պատմության մեջ այդպիսի օրինակներ չկան, խաղաղությունը չի լինում հետքաշվելով , զիջելով և թույլի դիրքից խոսելով։ Դրանով Դուք ագրեսորին ընդհակառակը , ավելի խթան եք տալիս շարունակելու իր գործողությունները»,- նշեց գործիչը՝ արձանագրելով, որ Արցախը զիջելուց հետո բոլոր այն ուժերը, որոնք կենտրոնացած էին Արցախի դեմ, հիմա ուղղված են մեր դեմ, մենք թուլացրեցինք մեր դիրքերը ՝ զիջելով Կիրանցը, Տավուշում մեր տարածքները։

«Այստեղ մասնագետ պետք չի լինել, ուղղակի պետք է սառը դատողությաամբ տեսնել, թե ինչպես է իրեն պահում իշխանությունը կամ բարարձակ չի հասկանում, թե ինչպես է աշխատում միջազգային համակարգը և չի ուզում ոչ մեկի լսել կամ, ուղղակի, կատարում է երրորդ ուժերի կամքը՝ հանձնել Հայաստանը, իսկ ժողովրդի ուշադրությունը շեղել ճաշկերույթներով և ուտելիքի փառատոններով, հեծանիվ քշելով։ Սա կատակերգություն է, ուղղակի կատակերգություն», - հավելեց Խաչիկյանն ու նման իրավիճակում բնական համարեց Ադրբեջանի նորանոր մեղադրանքներն ու պահանջները, քանի որ իրեն ուժեղ է զգում եւ տեսնում է, որ Հայաստանը թույլ է, դաշնակից չունի, նա շարունակելու է ամեն շաբաթ, ամեն ամիս , ամեն օր ինչ-որ նոր պատրվակ հնարել, որպեսզի ուժով ամեն ինչ ստանա և չկնքի այդ խաղաղության պայմանագիրը։

Ըստ նրա՝ նոր ռազմական գործողությունները հնարավոր են «COP 29»-ից հետո, իսկ մինչ Ադրբեջանը ձեռնպահ կմնա պատերազմ հրահրելուց՝ իր հեղինակությանը չվնասելու համար։

«Իրանի վրա շուտով հնարավոր է հակահարված Իսրայելի կողմից, դա կարող է բերել մեծ էսկալացիայի և այդ պայմաններում Ադրբեջանը և Թուրքիան պատրվակ կգտնեն, որպեսզի արևմուտքին առաջարկեն իրենց ծառայությունները, իսկ դրա դիմաց, ինչպես միշտ, հաշիվը պետք է փակենք մենք, զիջումները կկատարվեն մեր հաշվին»,- ասաց քաղաքագետը՝ ավելացնելով, որ հնարավոր է Իրանին առաջարկեն զիջել Զանգեզուրի միջանցքի հարցը՝ Ադրբեջանում գտնվող իսրայելական ռազմաբազաները չօգտագործելու դիմաց, նմանատիպ զիջումներ կարող են ստանալ նաև ՌԴ-ից։

«Ստացվում է, որ մենք գտնվում ենք ծանրագույն վիճակում» - ընդգծեց Խաչիկյանը։

Աղբյուր` Փաստինֆո