Փաստ ինֆո

Ներկայիս վարչախումբը հենվում է միայն ուժային կառույցների և Հանրային ՀԸ-ի վրա՝ փորձելով պահել իշխանությունը։ Այս մասին «Փաստինֆո»-ի հետ զրույցում ասաց փաստաբան Սերգեյ Հարությունյանը։

Թե ինչու են իրավապահները հլու-հնազանդ ենթարկվում իշխանություններին, ինչով են պայմանավորված երկակի ստանդարտները՝ Հարությունյանը նշեց, որ նույն քննչական մարմիններում քննիչներ, դատախազներ, բարձրաստիճան ոստիկաններ իրենց անհամաձայնությունն են հայտնում այս իշխանությունների հետ, երբեմն՝ բացասական կարծիք հայտնում իշխանությունների գործունեության հետ, բայց ասում են՝ «ինչ անենք, ընտանիք ենք պահում»՝ արդարացում չէ։

«Արյունոտ կերած հաց է․․․ Այն, ինչ վիճակում ենք այսօր, ցավոք, դա միշտ է եղել․․․ շատ ոստիկաններ, որոնք այսօր հլու-հնազանդ ծառայում են՝ նախկինում էլ են ծառայել, նույն մարդիկ միանգամից փոխվել են, փորձել՝ այդկերպ հացը վաստակել, երբեմն՝ արջի ծառայություններով, ինչն ամենացավոտն է։ Հաջորդ իշխանությունները, հույս ունեմ, այլևս չեն հենվի սրա վրա, որ եթե կարմիրբերետավորը, որը դաժանաբար ծեծում էր, հիմա էլ՝ իր համար կծառայի, ինչն արվեց այս իշխանությունների պարագայում։ Ոչ, բոլոր անձինք, որոնք քրեորեն հետապնդելի արարք են արել, հատկապես՝ ժողովրդի նկատմամբ, պետք է պատասխանատվության ենթարկվեն։ Ով, որ հանցանք է գործել՝ պետք է պատասխանատվության ենթարկվի»,- ասաց փաստաբանը։

Ինչ վերաբերում է Փաշինյանի հայտարարությանը՝ ՔԿ 10-ամյակին նվիրված, թե զրոյական կետ է համարվում, ինչ սպասել, ՔԿ-ն էլ են «հանձնում»՝ Հարությունյանը նշեց, որ վախենալու վիճակում ենք գտնվում, այդ անձի ամեն հայտարարությունից հետո ականատես ենք լինում բացասական դեպքերի, զարգացումների։

«Իրավական ոլորտի բոլոր անհաջողությունները, երբ դատական իշխանությունը , իրավապահ համակարգը դառնում է մեկ մարդու համար աշխատող կառույց, երբ ոստիկանական ողջ համակարգը կենտրոնացած է մեկ մարդուն՝ ա կետից բ կետ տեղափոխելու հարցում, երբ երկիրը վխտում է հանցավորությամբ և թմրամիջոցներով, երբ խախտվում են մարդու իրավունքները, այս երկրում չեն կարող լինել ներդրումներ, տնտեսական զարգացում, թուլանում է երկրի արտաքին քաղաքականությունը։ Դատական իշխանության թուլացումը պարտադիր կերպով բերելու է այլ ոլորտների թուլացման»,- ասաց նա։
Անդրադառնալով սահմանադրական արդարադատության վիճակին՝ Սերգեյ Հարությունյանը նշեց, որ այսօր ցավոք ունենք այնպիսի ՍԴ, որը ձևավորվել է 2020թ․, այն կազմը, որը հաջողվեց ստանալ՝ շատ վտանգավոր է ՀՀ ապագայի համար։ Հարությունյանը հիշեցրեց ՍԴ վերջին որոշումներից մեկը՝ Ադրբեջանի հետ սահմանազատման կանոնակարգի սահմանադրականության հարցով, որով անդրադարձ է կատարվել Անկախության հռչակագրին, ինչը մեծ հարված էր ՀՀ անկախությանը, Արցախը՝ վաղ, թե ուշ հետ բերելու հավանականությանը, Հայ դատին և սփյուռքի հետ հարաբերություններին։ Ըստ փաստաբանի՝ դա ՀՀ անկախության դեմ ուղղված քայլ էր և պարզ է, թե ինչու էին 2020թ․ նման տոտալ ճնշումներով ձևավորել կազմը, նախկին կազմի դեպքում նման տխրահռչակ որոշում չէր լինի։

Փաստաբանն ուշադրություն հրավիրեց նաև ՍԴ որոշմամբ Անկախության հռչակագիրը «զավակին խշռող ծնողի» հետ համեմատելուն, ապա հիշեցրեց․ «Կցանկանայի հիշեցնել բոլոր՝ իշխանություններին ինքնամոռաց ծառայող մարդկանց՝ մի մոռացեք, որ հեղափոխությունն էլ իր զավակներին է խժռում, դրա վառ ապացույցն էլ ունենք, որ ինքնամոռաց ծառայող շատ պաշտոնյաներ այլևս պաշտոնյա չեն, դատավորներ՝ այլևս դատավոր չեն, ոչ ոք ապահովագրված չէ և փորձը ցույց է տալիս, որ վարչապետի պաշտոնը զբաղեցնող անձի համար չկան մշտական յուրայիններ, կա օրվա շահ»։ Թե արդյոք Գրիգոր Մինասյանի հրաժարականը ևս այդ համատեքստում չէ, քավության նոխազ են դարձրել՝ մեր զրուցակիցը նշեց, որ ժամանակին քավության նոխազներ կլինեն։

Մանրամասները՝ տեսանյութում

Հեղինակ՝ Իզաբել Սահակյա

Աղբյուր` Փաստինֆո