Փաստ ինֆո

ՀՀ վարչապետ Նիկոլ Փաշինյանը «Խաղաղության խաչմերուկ. միավորելով անվտանգությունն ու ժողովրդավարությունը» համաժողովի շրջանակներում անդրադարձել է տարածաշրջանային կապուղիների ապաշրջափակման պարագայում Հայաստանի տարածքով անցնող ճանապարհների անվտանգության ապահովմանն՝ ընդգծելով, որ Ռուսաստանն ու Ադրբեջանը հղում են անում Նոյեմբերի 9-ի հայտարարությանը՝ ասելու համար, թե Նոյեմբերի 9-ի եռակողմ հայտարարության 9-րդ կետով կապուղիների անվտանգությունը արտապատվիրակված է ՌԴ-ին։

Նա ևս մեկ անգամ մեջբերեց հայտարարության 9-րդ կետը՝ ընդգծելով, որ այդ կետում նման բան նշված չէ, ապա նաև անդրադարձավ հայտարարության նախորդ 8 կետերին։

«Նոյեմբերի 9-ի հայտարարությունն ունի 9 կետ, իսկ որտե՞ղ է հիմա Լաչինի միջանցքը, որտե՞ղ են հիմա խաղաղապահները, որոնք եռակողմ հայտարարության համաձայն պետք է տեղակայված լինեին Լեռնային Ղարաբաղում

Որտե՞ղ է եռակողմ հայտարարության 7-րդ կետը, որտեղ ասվում է՝ Ներքին տեղահանված անձինք և փախստականները վերադառնում են ԼՂ տարածք և հարակից շրջաններ ՄԱԿ-ի փախստականների հարցով գերագույն հանձնակատարի գրասենյակի վերահսկողության ներքո։ Ինչո՞ւ հիմա ներքին տեղահանված անձինք և փախստականները չեն վերադարձել և չեն վերադառնում ԼՂ։
Էլ չեմ ասում, որ հայտարարության մեջ նշվում է նաև, որ իրականացվում է ռազմագերիների, պատանդների, այլ պահվող անձանց, ինչպես նաև զոհվածների մարմինների փոխանակում։ Ադրբեջանը հիմա շատ թմբկահարում է անհետ կորածների խնդիրը։ Մենք այդ խնդիրը հասկանում ենք, բայց ՀՀ-ն այսօր շուրջ 1000 անհետ կորած մարդ ունի, որոնց ճակատագիրը նույնպես պետք է պարզաբանվի։ Մենք այսօր գերեվարված մարդ ունենք 2020 թ-ից գտնվում են գերության մեջ։

Շատ լավ տեսակետ կա, որտեղ ասվում է, որ նմանք ռազմագերի չեն, բայց այս կետը միայն ռազմագերիների մասին չէ, այս կետը վերաբերում է անազատության մեջ պահվող ցանկացած մարդու։ Այսինքն, բացարձակապես անընդունելի է 9 կետ ունեցող հայտարարությունից վերցնել մեկը և անընդհատ դա շեշտել»։

Աղբյուր` Փաստինֆո