Փաստ ինֆո

Ռոբերտ Քոչարյանի և մյուսների նկատմամբ քրեական հետապնդումն այս պահին դադարեցված չէ։ Դատական նիստում նման պնդում է կատարել հանրային մեղադրող Հայկ Հովհաննիսյանը։

«Փաստինֆո»-ի թղթակցի հաղորդմամբ՝ Հակակոռուպցիոն դատարանում՝ դատավոր Սարգիս Պետրոսյանի նախագահությամբ, այսօրվա դատական նիստի մեկնարկին՝ ներկայացած անձանց ինքնությունը պարզելու ընթացքում Ռոբերտ Քոչարյանի պաշտպան Արամ Օրբելյանն առարկեց՝ ծանուցման մեջ «մեղադրյալ» նշման առումով՝ նկատելով, որ քրեական վարույթը կարճվել է, այժմ գոյություն չունի ՀՀ (նախկին) քրեական օրենսգրքի 300,1-րդ (սահմանադրական կարգի տապալման) հոդված։

«Ես ծանուցվել եմ որպես մեղադրյալ, խնդրում եմ պարզաբանեք, թե ինչ հոդվածով եմ ես մեղադրյալ։ Ես եկել եմ այստեղ՝ որպես բարի կամքի դրսևորում, ըստ էության ես կարող էի ընդհանրապես չգալ: Եկել եմ մեկ նպատակով, նախ չմտածվի, որ ես կարող է վախեցել եմ դատարան գալուց: Համոզված եմ՝ Դուք էլ եք գիտակցում, որ այստեղ խնդիր կա և այն պետք է շտկվի»,- այս մասին դատական նիստի ժամանակ հայտարարեց ՀՀ երկրորդ նախագահ Ռոբերտ Քոչարյանը՝ նշելով, որ ինքը կնստի այլ վայրում, երբ շտկվի, կվերադառնա մեղադրյալի աթոռին։ Նա նշեց, որ այս հետապնդումն ի սկզբանե սկսվել է խախտումներով, հիմա վերսկսվել է, գոնե հիմա խախտումներ չպետք է լինեն։

Դատավարական կարգավիճակ չունենալու հարցն այս պահին բարձրացրեց նաև Յուրի Խաչատուրովի պաշտպան Միհրան Պողոսյանը՝ նշելով, որ, եթե այս պահին մեղադրյալի կարգավիճակ չունի, ապա ինչու է թարգմանիչ ներգրավվել։ Նախագահող Սարգիս Պետրոսյանն էլ նկատեց՝ այս պահին, նկատի ունենալով ՍԴ որոշումը, մեղադրյալի կարգավիճակ ունեն՝ 300,1-րդ հոդվածով, ինչին արձագանքեց Պողոսյանը՝ նկատելով, որ այս պահին ՍԴ որոշմամբ նման հոդված գոյություն չունի։

Հանրային մեղադրող Հայկ Հովհաննիսյանը դիրքորոշում հայտնեց՝ նշելով, որ ՍԴ որոշումն ինքնին քրեական հետապնդումը բացառող հանգամանք չէ, բացի այդ, Ռոբերտ Քոչարյանի և մյուսների նկատմամբ քրեական հետապնդումն այս պահին դադարեցված չէ և նրանք շարունակելու են ունենալ մեղադրյալի կարգավիճակ։
«Այդ հետապնդումը դադարեցնելու մասին որոշումը բեկանվել է Վճռաբեկ դատարանի կողմից և այս պահի դրությամբ և մինչև քրեական հետապնդումը դադարեցնելու և վարույթը կառճելու հարցի լուծումը, մեղադրյալները շարունակելու են ունենալ մեղադրյալի կարգավիճակ»,- ասաց դատախազը:

Հիշեցնենք, որ 2008թ․ մարտի 1-ի իրադարձություններին առնչվող՝ իբրև սահմանադրական կարգի տապալման գործով մեղադրյալի կարգավիճակում էին ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։ Յուրի Խաչատուրովը և Սեյրան Օհանյանը մեղադրվում էին սահմանադրական կարգը տապալելու համար, Ռոբերտ Քոչարյանը՝ ՀՀ սահմանադրական կարգը տապալելու և առանձնապես խոշոր չափերով կաշառք ստանալու, իսկ Արմեն Գևորգյանը՝ ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու համար։

ՍԴ-ի կողմից՝ 2021թ․ մարտի 26-ին ՀՀ Քրեական օրենսգրքի (2003թ․) 300,1-րդ հոդվածը Սահմանադրության 78-րդ և 79-րդ հոդվածներին հակասող և անվավեր ճանաչելուց հետո Երևանի ընդհանուր իրավասության դատարանը՝ դատավոր Աննա Դանիբեկյանի նախագահությամբ, սահմանադրական կարգի տապալման դրվագով կարճել էր քրեական գործը և դադարեցրել քրեական հետապնդումը՝ հանցադեպի բացակայության հիմքով, թեև դատախազները պահանջում էին վերաորակել արարքը։ Դատախազության վերաքննիչ բողոքը մերժվել է, իսկ Վճռաբեկ դատարանը դիմել էր ՍԴ՝ վիճարկելով Քրեական դատավարության օրենսգրքի մի շարք հոդվածների Սահմանադրությանը համապատասխանելու հարցը: Խնդիրը 1998-ին ընդունված, այժմ մասնակի գործող Քրեական դատավարության օրենսգրքի 309.1 հոդվածի 3-րդ մասն էր, որը հնարավորություն չէր տալիս հոդվածը հակասահմանադրական ճանաչելուց հետո դատարանում վերաորակել մեղադրանքը: ՍԴ-ն որոշել է մասնակի բավարրարել դիմումը՝ նշելով, որ թեև հոդվածը համապատասխանում է Սահմանադրությանը, այն մեկնաբանությամբ, որ ամբաստանյալին մեղսագրվող արարքը հակասահմանադրական ճանաչվելիս մեղադրողը կարող է մինչև դատարանի խորհրդակցական սենյակ հեռանալը փոխել ամբաստանյալին առաջադրված մեղադրանքը մեղադրյալի արարքում քրեական օրենքով նախատեսված այլ արարքի հատկանիշների առկայության պարագայում՝ անկախ դատական քննության ընթացքում ապացույցների հետազոտումից: Վճռաբեկ դատարանը որոշել է բավարարել դատախազության բողոքը։

Հեղինակ՝ Իզաբել Սահակյան

Աղբյուր` Փաստինֆո