Փաստ ինֆո

Թուրքիայի տրանսպորտի նախարարի հայտարարությունը ավելորդ անգամ ապացուցում է այն, որ ՀՀ իշխանությունների խոսքը և գործը իրարից տարբերվում են։ Այս մասին «Փաստինֆոյի» հետ զրույցում ասաց ԱԺ նախկին պատգամավոր Արման Աբովյանը՝ անդրադառնալով Թուրքիայի տրանսպորտի և ենթակառուցվածքի նախարար Աբդուլքադիր Ուրալօղլույի հայտարարությանը, թե «Զանգեզուրի միջանցքի» շուրջ հայկական կողմի հետ կապված զարգացում կա և որ առաջիկա գործընթացում կհստակեցվի, և ամենակարճ ճանապարհով Ադրբեջանին և հետևապես թյուրքական աշխարհին կկապվենն։

«Մինչ մեզ հեքիաթներ են պատմում, որ ոչ մի «Զանգեզուրի միջանցք» չի լինի, այսինքն, չի լինի թուրքերի տրամաբանության ներքո, ըստ էության, մենք ունենք մի իրավիճակ, որ Թուրքիայի բարձրաստիճան պաշտոնյան՝ էրդողանի կաբինետի նախարարը հայտարարում է, որ կան որոշակի դրական շարժեր հայկական կողմի հետ բանակցություններում։ Այս պարագայում նա կրկին հիշատակում է Ադրբեջանը»,-ասաց Աբովյանը՝ հիշեցնելով, որ Ադրբեջանն, ըստ էության, ուզում է մի ճանապարհ, որը ոչ մի կերպ չի վերահսկվի հայկական կողմից։

Նա ընդգծեց, որ, ըստ էության, ստեղծվելու է մի իրավիճակ, երբ թուրքական աշխարհի միավորման հիմնական կամուրջը դառնալու է Հայաստանը։

«Թուրքական աշխարհի միավորումը կամ «Զանգեզուրի միջանցքը» երկու ֆունկցիա է իրականացնելու. սկզբնական փուլում ՀՀ հարավի անեքսիան, որից հետո Հայաստանի՝ «արևմտյան ադրբեջանացման» գործընթացը կմտնի իրականաձման փուլ։

Այսինքն, սուտը, թե ներգրավելու են միջազգային պահնորդական ընկերություն՝ աճպարարություն է։ Ըստ էության՝ այսօր թուրքական կողմը բացահայտում է իրական բանակցությունների տրամաբանությունը։ Ես ավելի քան համոզված եմ սրանք դեռ շատ ավելի վաղ կհանձնեն ամեն հնարավոր բան, թե «միջանցքը», թե Հայաստանի հարավը։ Այստեղ, Իրանի գործոնն էր, որն ըստ էության՝ գտնվելով նախապատերազմական իրավիճակում, այնուամենայնիվ, իր աչքից չէր հեռացնում հայկական հարցի հեռացումը, այսինքն, ՀՀ հարավի ենթադրյալ աննեքսիան»,- արձանագրեց գործիչը։

Հարցին, թե այսինքն, այժմ Իրանը թո՞ւյլ կտա նման սցենար՝ նա պատասխանեց, որ եթե ՀՀ-ն համաձայնի, ապա Իրանի մանևվրելը շատ կնեղանա։ «Իրանը չի կարող մեր փոխարեն որոշում կայացնել, բայց այն, որ Իրանը կիրառելու է բոլոր հանարվոր և անհնար մեթողները, որ կանխի իր սահմանների շուրջ գեներացվող վտանգները՝ ես համոզված եմ»։

Դիտարկմանը, թե տարօրինակ զուգադիպությամբ՝ այս պայմանավորվածության մասին թուրք պաշտոնյան խոսում է Մոսկվա այցից հետո, հնարավո՞ր է, որ նման պայմանավորվածություն ձեռք է բերվել Մոսկվայում՝ Աբովյանն ասաց, որ բացառում է։ ««Զանգեզուրի միջանցքը» կտրուկ ձեռնատու չէ ՌԴ-ին, քանի որ թուրքական աշխարհի միավորումը ուղղակի վտանգում է ՌԴ-ի հարավային շրջանները, Հյուսիսային Կովկասը»,-ասաց նա։

Աղբյուր` Փաստինֆո