Փաստ ինֆո

«Փաստինֆոն» պարբերաբար անդրադարձել է Լենինգրադյան 19/9 հասցեում կառուցվող նորակառույցի առաջացրած խնդիրներին, նորակառույցը, որ զավթում է երթևեկելի գոտին ու հետիոտնային անցման տարածքը՝ սկսել է ընդլայնվել։ Կառուցապատողը անավարտ շենքի հարևանությամբ նոր շինության հիմք է փորել։

«Փաստինֆոն» դիմել էր Երևանի քաղաքապետարան՝ պարզելու արդյո՞ք նոր շինության շինարարության համար կառուցապատողը թույլտվություն ունի՞, թե՞ ոչ։ Եւ, ի վերջո, ինչով է պայմանավորված հարեւան շենքերի բնակիչների կյանքը մղձավանջի վերածած շինարարության ժամկետների ձգձգումը։

Ի պատասխան մեր հարցի՝ հայտնեցիբ, որ 2019 թ-ի մարտի 27-ին տրված համաձայնեցված նախագծի համաձայն իրականացվում է Լենինգրադյան 19/9 հասցեում բազմաբնակարան շենքի շինարարությունը։ «Եթե շինարարությունն ունի համաձայնեցված նախագիծ, ապա ունի նաև ճարտարապետանախագծային առաջադրանք և շինթույլտվություն»։

Մեզ հայտնեցին, որ բոլոր այն մտահոգությունները, որոնք բարձրաձայնվել են՝ անհիմն են, որովհետև քաղաքապետարանի աշխատակիցները գնացել՝ ուսումնասիրել են և պարզել, որ օրինական նախագծի հիման վրա է արվում շինարարությունը։ «Այն տպավորությունը, որ այս պահին մայթի հատվածում փոս է փորվել՝ այս պահի վիզուալ տպավորությունն է, որովհետև շինարարության ավարտից հետո լինելու է մայթ, որը բնականաբար բարեկարգվելու է, պահպանվելու է ու նախագծի համաձայն է իրականացվում։ Որևէ շեղում նախագծից չկա , ամեն բան արվում է օրինական շինթույլտվության և օրինական նախագծերի հիման վրա»,-վստահեցրեցին քաղաքապետարանից։

Քաղաքապետարանից ստացած պատասխանը մեղմ ասած՝ զարմանալի էր, քանի որ նախ՝ 2020 թ-ին մեկնարկած շինարարության տևողությունն, ըստ նախագծի՝ պետք է լիներ 24 ամիս, մինչդեռ 2 տարվա փոխարեն շինարարությունն ընթանում է արդեն 4 տարի, ու շինարարության ավարտն այդպես էլ չի երևում։ Ինչ վերաբերում է նախագծին, ապա կառուցապատողի կողմից հրապարակված նախագծում չգտանք այլ շինության նկար, ինչն էլ հիմք է տալիս ասելու, որ այդ հատվածում նոր կառուցապատում անելու թույլտվություն կառուցապատողն, այնուամենայնիվ, չունի, եթե, իհարկե, հետագայում նախագծում փոփոխություն չի արվել։

Աղբյուր` Փաստինֆո