Փաստ ինֆո

ՍԴ-ն իրավաբանորեն խուճուճ որոշում է կայացրել ՝ շրջանցելով խնդիրները։ Շատ դժվար է հասկանալ, թե ՍԴ-ն ի՞նչ է ցանկացել անել՝ ժամանակ շահե՞լ, թե՞ այլ բան։ «Փաստինֆո»-ի հետ զրույցում ասաց ՀԱԿ փոխնախագահ, ՀՀ ԳԽ և ԱԺ նախկին պատգամավոր Արամ Մանուկյանը։

Հիշեցնենք, որ ՍԴ-ն սեպտեմբերի 26-ին Սահմանադրությանը համապատասխան է ճանաչել կանոնակարգը, սակայն 33 էջից բաղկացած որոշման բացարձակ մեծամասնությունը կազմում էր ոչ թե բուն կանոնակարգի, այլ՝ Անկախության հռչակագրի վերաբերյալ վերլուծությունները։ ՍԴ-ն որոշմամբ փաստացի չգործող է համարել Հռչակագրի որոշ դրույթներ, կասկածի տակ դրել այն, անգամ՝ համեմատել «զավակին խժռող ծնողի» հետ։

Արամ Մանուկյանի գնահատմամբ՝ ՍԴ նշված որոշումը քաղաքական խայտառակ փաստաթուղթ է՝ պոետիկ երանգավորումներով, բանաստեղծական մելամաղձով ու թաքնված քաղաքական երանգ ունի։

Նրա խոսքերով՝ կանոնակարգի՝ ՀՀ Սահմանադրության համապատասխանության հարցը քննարկելիս, ՀՀ ՍԴ-ն կարող էր ընդհանրապես չանդրադառնալ Անկախության Հռչակագրին։

«Իրենք կարող էին շատ հանգիստ որոշում կայացնել, որ օրինակ Հայաստանի և Ադրբեջանի սահմանազատման ու սահմանագծման կանոնակարգի՝ ՀՀ սահմանադրությանը համապատասխանելու մասին, բայց իրենց նպատակը ոչ միայն դա էր, այլ, ըստ իս, Ադրբեջանին ինչ-որ բան ցույց տալը, որ հավատարիմ են, իրենց ասած, խաղաղության սկզբունքին կամ պայմանագրին։ Դա նաև արդարացում էր Անկախության Հռչակագրի մասով, իբր թե հռչակագիրը չի խանգարում դրան», - ասաց Մանուկյանը՝ հիշեցնելով, որ, այնուամենայնիվ, դրան անմիջապես եղավ Ադրբեջանի արձագանքը, ինչը վկայում էր , որ Ադրբեջանն այդ քաղաքական ժեստը չի ընդունել։

Արամ Մանուկյանի գնահատմամբ՝ իշխանության հնարքը չաշխատեց։ «Խնդիրը հիմնականում հետևյալն է, որից իրենք չեն կարող խուսափել և դա Սահմանադրական դատարանի սարքած թակարդն է։ Սահմանադրական դատարանն ունի 2021 թվականի որոշում, ըստ որի մեր Սահմանադրության պրիամբուլան համարվել է անփոփոխելի դրույթ, այն որևէ կերպ փոփոխել հնարավոր չէ, անգամ հանրաքվեով, քանի որ դա ֆիքսված է որպես անփոփոխելի դրույթ, հոդված։ Հիմա իրենք անընդհատ պետք է ձևեր գտնեն՝ ասելու, որ Անկախության հռչակագիրը չի խանգարում, կամ հիմք ստեղծեն սահմանադրությունն ամբողջությամբ փոխելու համար։ Իրենք և՛ իրավական, և՛ քաղաքական առումով թակարդի մեջ են, չգիտեն ինչ լուծումներ գտնել, այդ 30 էջի մեջ անընդհատ խուսափոխական լուծումներ են փորձել գտնել, առաջարկել կամ թաքցնել հիմնական խնդիրը։ Իսկ հիմնական խնդիրներից մեկն այն է, որ գրել են, թե չի հակասում Սահմանադրությանը, մինչդեռ իրականում հակասում է, որվհետև Հայաստանի Սահմանադրությամբ ՀՀ սահմանների որեւէ միլիմետրի փոփոխություն միայն ու միայն հանարաքվեով պետք է լինի։ Իրենք փորձում են դա սվաղելով անցնել, բայց դա չի կարող լինել առանց հանարաքվեի»,- նշեց պարոն Մանուկյանը։

Գործչի արձանագրմամբ՝ կանոնակարգը հաստատվել է միայն Հայաստանում, իսկ Ադրբեջանը դեռ չի էլ անդրադարձել դրան։

«Ադրբեջանին ինչ էլ տաս՝ չի բավարարվելու, սա հերթական՝ «ինչո՞ւ գլխարկ չես դրել վիճակն է», Ադրբեջանը նպատակ չունի խաղաղության փաստաթուղթ ստորագրելու»,- ընդգծել է ՀԱԿ փոխնախագահն ու ավելացրել, որ անգամ Անկախության հռչակագրի վրա հղումը ՀՀ սահմանադրությունից հանելու դեպքում, ադրբեջանցիները կարող են պահանջել, որ փոխվեն բոլոր այն օրենքները, որոնց թիվը մոտ 100-ի է հասնում, որտեղ հղում կա Անկախության հռչակագրին ու այդպես շարունակաբար նոր պահանջներ առաջ կքաշվեն։

Աղբյուր` Փաստինֆո